Пирезидент доналд трамп хитай билән сода тәңпуңсизлиқини өзгәртидиғанлиқини билдүргән

Йеңидин вәзипигә олтурған америка пирезиденти доналд трамп, 23-январ күни шивейтсарийәдики давоста өткүзүлгән “дуня иқтисад мунбири” дә қилған сөзидә, америка билән хитайниң кәлгүси сода мунасивити һәққидә тохталған. У, хитай билән болған содида һәқсизлик вә тәңпуңсизлиқ барлиқини, буни өзгәртип йеңи иқтисад тәртипи қуруп чиқидиғанлиқини, шундақла хитайға һәйдәкчилик қилип, русийәниң украинаға қилған таҗавузчилиқ һуҗумини тохтитишқа тиришидиғанлиқини билдүргән.

Пирезидент трамп 21-январ күни имзалиған буйруқида, америкаға кириватқан фентанил қатарлиқ зәһәрлик буюмларни чәкләш үчүн, хитайға қойған таможна беҗини йәнә 10 пирсәнт ашуридиғанлиқини, мексикаға б 25 пирсәнт таможна беҗи қойидиғанлиқини, 2-айниң 1-күнидин башлап буни иҗра қилидиғанлиқини җакарлиғаниди. Доналд трамп “дуня иқтисад мунбири” дә қилған сөзидә, асия дөләтлири билән адил сода тәртипи қурушқа һәрикәт қилидиғанлиқини билдүрүп, хитайға қошулған 10 пирсәнт таможна беҗиниң сәвәбигә чүшәндүрүш бәргән.

“фокс хәвәрлири” тори 23-январ бу һәқтә елан қилған хәвиридә, америка билән хитай оттурисидики сода мунасивитиниң пәқәт тәңпуңсизлиқ әмәслики, бәлки хитайниң америка билән болған сода мунасивитини суйиистемал қилип, америкаға фентанил қатарлиқ зәһәрлик буюмларни биваситә яки васитилик йоллар билән киргүзүватқанлиқи, шуңа трампниң бу мәсилини һәл қилиш үчүн хитай вә мексикаға қаратмилиқ һалда таможна беҗи қойғанлиқи баян қилинған.

23-январ күни, америка дөләт мәҗлиси америка-хитай риқабити алаһидә комитетиниң рәиси җон моленар билән авам палата әзаси том сози “адил содини әслигә кәлтүрүш қануни” дәп аталған бир қанун лайиһәсини тонуштурған болуп, униңда хитайниң америка билән “даимлиқ нормал сода мунасивити” имтиязини бикар қилиш мәқсәт қилинған. Пирезидент трамп бәргән мәмурий буйруққа асасән қайта тонуштурулған бу қанун лайиһәсидә, америка билән адил сода қилмиған хитайниң әқлий мүлүк оғрилиқи, мәҗбурий әмгәк мәһсулатлирини америка базириға киргүзүш қатарлиқ қилмишлирини түгитишму муһим нишан қилинған.