Pirézidént donald tramp xitay bilen soda tengpungsizliqini özgertidighanliqini bildürgen

Washin'gtondin muxbirimiz jewlan teyyarlidi
2025.01.24

Yéngidin wezipige olturghan amérika pirézidénti donald tramp, 23-yanwar küni shiwéytsariyediki dawosta ötküzülgen “Dunya iqtisad munbiri” de qilghan sözide, amérika bilen xitayning kelgüsi soda munasiwiti heqqide toxtalghan. U, xitay bilen bolghan sodida heqsizlik we tengpungsizliq barliqini, buni özgertip yéngi iqtisad tertipi qurup chiqidighanliqini, shundaqla xitaygha heydekchilik qilip, rusiyening ukra'inagha qilghan tajawuzchiliq hujumini toxtitishqa tirishidighanliqini bildürgen.

Pirézidént tramp 21-yanwar küni imzalighan buyruqida, amérikagha kiriwatqan féntanil qatarliq zeherlik buyumlarni cheklesh üchün, xitaygha qoyghan tamozhna béjini yene 10 pirsent ashuridighanliqini, méksikagha b 25 pirsent tamozhna béji qoyidighanliqini, 2-ayning 1-künidin bashlap buni ijra qilidighanliqini jakarlighanidi. Donald tramp “Dunya iqtisad munbiri” de qilghan sözide, asiya döletliri bilen adil soda tertipi qurushqa heriket qilidighanliqini bildürüp, xitaygha qoshulghan 10 pirsent tamozhna béjining sewebige chüshendürüsh bergen.

“Foks xewerliri” tori 23-yanwar bu heqte élan qilghan xewiride, amérika bilen xitay otturisidiki soda munasiwitining peqet tengpungsizliq emesliki, belki xitayning amérika bilen bolghan soda munasiwitini suyi'istémal qilip, amérikagha féntanil qatarliq zeherlik buyumlarni biwasite yaki wasitilik yollar bilen kirgüzüwatqanliqi, shunga trampning bu mesilini hel qilish üchün xitay we méksikagha qaratmiliq halda tamozhna béji qoyghanliqi bayan qilin'ghan.

23-Yanwar küni, amérika dölet mejlisi amérika-xitay riqabiti alahide komitétining re'isi jon molénar bilen awam palata ezasi tom sozi “Adil sodini eslige keltürüsh qanuni” dep atalghan bir qanun layihesini tonushturghan bolup, uningda xitayning amérika bilen “Da'imliq normal soda munasiwiti” imtiyazini bikar qilish meqset qilin'ghan. Pirézidént tramp bergen memuriy buyruqqa asasen qayta tonushturulghan bu qanun layiheside, amérika bilen adil soda qilmighan xitayning eqliy mülük oghriliqi, mejburiy emgek mehsulatlirini amérika bazirigha kirgüzüsh qatarliq qilmishlirini tügitishmu muhim nishan qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.