Amérika pirézidénti donald tramp xitay mallirigha yene 10 pirsent qoshumche baj qoyidighanliqini jakarlighan

Amérika pirézidénti donald tramp 27-féwral peyshenbe küni, özining xitay mallirigha yene 10 pirsent qoshumche baj qoyidighanliqini, bu bajning 4-mart künidin bashlap yolgha qoyulidighanliqini éytqan.

NBC Xewerlirining bildürüshiche, bir neper aqsaray emeldari pirézidént trampning xitay mallirigha 10 pirsent qoshumche baj qoyghanliqini delilligen. U sözide, xitay mallirigha bundin ilgiri qoyulghan 10 pirsent baj bilen qoshup hésablighanda omumiy bajning jem'iy 20 pirsentke yetkenlikini éytqan.

Melum bolushiche, ilgiri méksika we kanadagha qoyulghan, emma waqitliq toxtitip qoyulghan 25 pirsentlik tamozhna béjimu 4-mart künidin étibaren yolgha qoyulidiken.

Pirézidént tramp xitayda yasalghandin kéyin kanada we méksika chégraliri arqiliq amérikagha kiriwatqan, yüz minglarche amérikaliqlarning jénigha zamin boluwatqan zeherlik chékimlik féntanélni cheklesh üchün, kanada we méksika chégraliridiki tekshürüshni kücheytish heqqide bésim ishletken. U, bu döletlerni 25 pirsentlik tamozhna béji bilen jazalighan, emma terepler arisidiki söhbettin kéyin bu jaza waqitliq toxtitip qoyulghan idi.

Pirézidént tramp, 27-féwraldiki uchurida kanada we méksikaning féntanilni cheklesh üchün yenila yéterlik tedbir qollanmighanliqini, bu döletler arqiliq amérikagha zor kölemde zeherning dawamliq kiriwatqanliqini tekitlep, ilgiriki tamozhna béjining pilan qilin'ghan waqitta yolgha qoyulidighanliqini jakarlighan.