Xitay yéngi tamozhna béji qararigha qarita amérika bilen bu heqte sözlishidighanliqini ipadiligen

“Shinxu'a tori” ning 4-marttiki xewirige asaslan'ghanda, xitay hökümiti amérikaning qoshumche 10 pirsent tamozhna béji élish qararigha qarita öch élish tedbiri qollinishtin burun, amérika bilen bu heqte sözliship mesilini hel qilishqa tirishidighanliqini ilgiri sürgen.

Xitay diplomatiye ministirliqining bayanatchisi lin ji'en (Lin Jian) mundaq dégen: “Eger amérikaning muddi'asi tamozhna béji, soda urushi yaki bashqa urushlarda ching turush bolsa, xitay her türdiki soda urushining axirlishishi üchün küresh qilidu. Biz amérikaning, tézdin söhbet we hemkarliq yoligha qaytishni tewsiye qilimiz”.

Pirézidént tramp ötken hepte xitayning féntanilni chekleshte yéterlik tedbir qollanmighanliqini bildürüp xitay mallirigha qoyghan 10 pirsent qoshumche tamozhna béji bügün, 4-mart resmiy yolgha qoyulushqa bashlighanidi. Melum bolushiche, xitay mallirigha bundin ilgiri qoyulghan 10 pirsent baj bilen qoshup hésablighanda omumiy baj jem'iy 20 pirsentke yétidiken.

Yéqinda BBC xewerliride analizchilarning xitay hökümiti yenila omumyüzlük soda urushining aldini élishni, tramp hökümiti bilen kélishim hasil qilishni ümid qilidu, dep qaraydighanliqi qeyt qilin'ghan bolsimu, emma xitay taratquliri xitay da'irilirining bir qatar taqabil turush tedbirlirige teyyarliq qiliwatqanliqini, amérikaning déhqanchiliq we yémeklik mehsulatlirini nishan'gha élishi mumkinlikini bildürgenidi.