Tramp hökümiti amérika portida toxtighan xitayning herqandaq paraxotidin heq élishni pilanlimaqtiken

Amérika hökümiti amérika portida toxtighan xitaygha baghlinishliq herqandaq paraxotlardin heq élishni, shundaqla ittipaqdashliriningmu shundaq qilishini telep qilishni pilanlighan.

Roytérs agéntliqining ashkarilishiche, nöwette tramp hökümiti bu heqte mexsus memuriy buyruq teyyarlighan bolup, uningda xitay yasighan yaki xitay bayriqi ésilghan herqandaq bir paraxot amérika portida toxtisa heq alidighanliqini, ittipaqdashliriningmu shundaq qilishi kéreklikini, eger shundaq qilmisa jazagha uchraydighanliqini tekitlimekte iken. Nöwette, tramp hökümiti amérikaning yerlik kémisazliq sana'itini janlandurushqa kirishken bolup, bu memuriy buyruq xitayning yer shari kémisazliq sana'iti sahesidiki tesirini azaytishni meqset qilidiken. Xitayning déngizlarda üzlüksiz éshiwatqan monopolluq küchige taqabil turup, amérika déngiz armiyesini qayta kücheytish, amérikadiki démokratchi we jumhuriyetchi qanun chiqarghuchilirining ortaq nuqtilirining biridur.

“Istratégiye we xelq'ara tetqiqat merkizi” ning sanliq melumatidin qarighanda, her yili dunya miqyasida yasalghan soda paraxotlirining 50 pirsentidin köp qismini xitay yasawatqan bolup, bu nisbet 1999-yili aran 5 pirsent iken. Roytérs agéntliqining bu xewiri, amérika bilen xitay özlirining her qandaq shekildiki urushqa teyyar ikenlikini qeyt qiliwatqan peytte élan qilin'ghan. Xitayning amérikada turushluq elchixanisi 5-mart küni amérikagha tehdit sélip, “Amérika urush qilishni xalisa, meyli u baj urushi, soda urushi yaki bashqa herqandaq shekildiki urush bolsun, biz urush qilishqa teyyar” dégen. Arqidinla amérika dölet mudapi'e ministiri pét xégsét, amérikaningmu xitay bilen urush qilishqa “Teyyar” ikenlikini éytqan.

Roytérs agéntliqining bildürüshiche, tramp hökümitining 27-féwral küni tüzülgen memuriy buyruqida, amérika portida toxtighan herqandaq bir paraxot “Meyli qeyerde yasalghan bolsun yaki kimning bayriqi ésilghan bolsun, xitay xelq jumhuriyitide yasalghan yaki uning bayriqini asqan kéme etritining terkibide bolsila choqum heq élinidighanliqi” buyrulghan.