Xitay terepning amérika-xitay soda kélishimidiki mezmunlarni özgertishi küchlük diqqet qozghimaqta

Muxbirimiz sada
2019-05-08
Élxet
Pikir
Share
Print

Amérika bilen xitay otturisidiki soda urushi künsayin keskinliship, axirqi kélishim téxi imzalanmighan bir mezgilde xitay terep ikki dölet otturisidiki soda kélishimining deslepki nusxisidiki mezmunlarni pütünley özgertiwetken.

"Roytérs" agéntliqining 8-maydiki xewirige qarighanda, xitayning mu'awin bash ministiri lyu xé amérika bilen bolghan soda söhbitini dawamlashturush meqsitide 9-may küni washin'gton'gha yétip kélidiken. Shu küni kechte ikki dölet otturisidiki soda kélishimning béyjing terep pütünley özgertip teyyarlighan deslepki nusxisimu washin'gton'gha ewetilgen. Xitay terep teyyarlighan kélishimning deslepki nusxisi 150 betke yéqin bolup, xitay terep buning mezmunigha pütünley özgertish kirgüzgen hemde shu arqiliq amérikaning yadroluq teleplirige qoshulmaydighanliqini ishare qilghan.

Xewerde déyilishiche, eslidiki soda kélishimining deslepki nusxisi yette bölektin terkib tapqan. Buningda amérikaning xitay üstidin soda urushi qozghishigha seweb bolghan bezi muhim mesililerge qarita xitay terepning muwapiq inkas qayturushi, yeni xelq'ara qanun-nizamlar boyiche kélishimge kélishi telep qilin'ghan. Bular asasliqi xitayning amérikaning eqliy mülükliri we soda mexpiyetlikini oghrilishi, amérika shirketlirini téxnika ötünüp bérishke qistishi, adaletsiz riqabet, maliye we pul-mu'amile sahesidiki monupolluq qatarliqlarni öz ichige alidiken.

Xewerge qarighanda, amérika prézidénti donald tramp xitayning mu'awin bash ministiri lyu xéning washin'gton'gha soda söhbiti üchün kelgen waqtigha toghrilap tiwittérda bir uchur yollighan. U bu uchurida xitayning 200 milyard dollarliq mehsulatlirigha %10 din %25 pirsentkiche tamozhna béji qoyidighanliqidin bésharet bergen.

Közetküchilerning qarishiche, xitayning eslidiki soda kélishimidiki muhim mezmunlarni özgertip élip kélishi we amérika otturigha qoyghan yadroluq mesililerdin özini qachurushi ikki dölet arisida aylardin béri dawam qiliwatqan soda urushining kélishim bilen hel bolmaydighanliqidin dérek béridiken.


Toluq bet