Президент трамп: "хитай билән сода келишими имзалашқа алдирашниң һаҗити йоқ"

Мухбиримиз әркин
2019-05-10
Share

Америка президенти трамп 10 май күни әтигәндә тветтерда учур йоллап, хитай билән сода келишими имзалашқа алдирашниң һечқандақ һаҗити йоқлуқини билдүргән.

У бу учурни америка һөкүмити хитайниң 200 милярд долларлиқ импорт мәһсулатиға 25 пирсәнт таможна беҗи қоюшни иҗра қилишқа башлап бир қанчә саәттин кейинла йоллиған. Президент трамп америка-хитай сода сөһбити 9 май күни вашингтонда өткүзүлүш һарписида 200 милярд долларлиқ хитай мәһсулатиға баҗ қойидиғанлиқини елан қилип, униң 10 май күнидин башлап иҗра қилинидиғанлиқини билдүргән иди. Униң баҗни өстүрүш қарари хитайниң муавин баш министири лю хе башчилиқидики сода вәкилләр өмики вашингтонда америка малийә министири мнучин, сода министири лайтхайзер билән сөһбәт өткүзүп, техи сөһбәт ахирлашмиғанда иҗра қилинишқа башланған иди.

Президент трамп учурида "хитай билән болған сөһбәт наһайити достанә кәйпиятта давам қилмақта. Баҗ өстүрүлүп, хитай 250 милярд долларлиқ мәһсулати үчүн америкиға 25 пирсәнт баҗ төләватқан әһвалда алдирашқа һечқандақ һаҗәт йоқ. Бу зор төләнмә биваситә америка хәзинисигә кириду" дегән. У буниң алдида йоллиған тветер учурида "хитай ахирқи минутқа кәлгәндә сөһбәт келишимини қайта музакирә қилимиз, десә болмайду. Биз хитайни бу иштин қечип қутулушиға бопту дәйдиған обама һөкүмити яки әхмәқ җоениң һөкүмити әмәс" дегән.

Ройтерс агентлиқиниң ашкарилишичә, хитай тәрәп өткән һәптә бейҗиңда өткүзүлгән сөһбәттә бурун бәргән вәдилиридин йенивелип, келишимни қайта музакирә қилишни тәләп қилған икән. Көзәткүчиләр вашингтонда өткүзүлүватқан ахирқи сөһбәттә һечқандақ нәтиҗә чиқмайдиғанлиқини билдүрмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт