Prézidént tramp xitay sodida öch alsa aqiwetning chataq bolidighanliqini agahlandurdi

Muxbirimiz erkin
2019-05-13
Élxet
Pikir
Share
Print

Amérika-xitay soda urushi téximu keskinlishishke bashlidi. Prézidént tramp düshenbe küni xitayning sodida amérikagha qarshi öch élish tedbiri qollansa aqiwetning téximu chataq bolidighanliqini agahlandurdi.

U bu sözlerni xitay hökümitining amérikagha qarita sodida öch élip tedbiri qollinidighanliqini élan qilishigha qarita éytqan. U 13‏-may, düshenbe küni twétirda xitayning uzun yillardin béri amérikadin payda élip kelgenlikini agahlandurup, "Shunga, xitay öch almasliqi kérek. Eger öch alsa téximu chataq bolidu" dégen. Prézidént tramp ötken hepte 200 milyard dollarliq xitay import mehsulatigha bajni 25% östüridighanliqini élan qilghan. Arqidinla xitay hökümiti 60 milyard dollarliq amérika import mehsulatigha 10% din 25% giche baj östüridighanliqini jakarlap, öch élish tedbiri qollan'ghan idi.

Prézidént tramp 13‏-may küni etigende twétirgha yollighan uchurida yene "Men shi jinping we xitaydiki bashqa dostlargha nahayiti ochuq qilip: eger siler kélishim hasil qilmisanglar xitay bek chataq ehwalda qalidu. Chünki, shirketler bashqa döletlerge yötkilishke mejbur bolidu. Xitaydin bir néme sétiwélish téximu qimmetke toxtaydu. Siler nahayiti yaxshi bir kélishimge asasen kélip qalghan, lékin siler yéniwaldinglar, dep éyttim" dégen.

Amérika-xitay axirqi qétimliq soda söhbiti ötken peyshenbe küni washin'gtonda ötküzülgen, lékin söhbet netijisiz axirlashqan. Roytérs agéntliqining xewer qilishiche, xitay axirqi söhbette burun kélishken nurghun wediliridin yéniwélip, söhbetni bashtin bashlashni telep qilghan. Lékin prézidént tramp xitayning teklipini ret qilghan. Nöwette xitayning néme üchün kélishimdin yéniwalghanliqi her xil perezlerge seweb bolmaqta. Prézidént tramp yekshenbe küni élan qilghan twétir uchurida, xitayni 2020‏-yildiki amérika prézidént saylimigha ümid baghlash bilen eyibligen. U؛ "Xitay kallisi ishlimeydighan jé'o baydén yaki bashqa birining 2020‏-yili saylinishigha ümid baghlimaqta. Ular amérikani talan-taraj qilmaqchi" dégen.

Toluq bet