Америка һөкүмити сода урушиниң йеңи қәдимини алди

Вашингтондин мухбиримиз әзиз тәйярлиди
2024.05.14

Америка-хитай оттурисидики сода урушида давам қиливатқан тиркишиш вә бир изда туруп қелиш вәзийити 14-май күни йеңи бир сәһипигә йөткәлди. Америка пирезиденти җов байден хитайдин импорт қилинидиған бир қисим таварларға қоюлидиған таможна беҗини өстүридиғанлиқини рәсмий елан қилди. Буниңда електр қуввәтлик аптомобилларға 100 пирсәнт баҗ қоюштин башқа алюмин, полат, йерим өткүзгүч қатарлиқларға һәссиләп баҗ қоюлидиғанлиқи бекитилди. Буниң билән сабиқ пирезидент доналд трамп дәвридә башланған “хитай таварлириға қарита таможна беҗини өстүрүш” һәрикити йеңи бир сәвийәгә йүксәлди.

Ақсарайниң бу һәқтики баянатида буниңдики асаслиқ сәвәбләр һәққидә тохтилип, “биз хитайниң йиллардин буян тәңсиз сода паалийити арқилиқ америка иқтисадиға вә дөләт бихәтәрликигә тәһдит пәйда қилишиға, шуниңдәк әқлий мүлүк оғрилиқи, технологийә вә иҗадчанлиқ саһәлиригә нисбәтән әндишиләрни көпәйтишигә қарап туралмаймиз” дейилгән. Шуниңдәк дәсләпки қәдәмдә хитайдин импорт қилинған 18 милярд америка доллирилиқ малға қоюлидиған таможна беҗиниң өстүрүлгәнликини әскәртилгән.

“ню-йорк вақти” гезитиниң 14-майдики обзор мақалисидә көрситилишичә, доналд трампниң сода уруши асаслиқ завутларни хитайдин америка тәвәсигә яндуруп келишни көзлигән болса, җов байденниң сода уруши америка тәвәсидә пакиз енергийәгә охшаш юқири пән-техникалиқ санаәтләрниң ишләпчиқириш вә хизмәт көлимини ашурушни нишан қилған.

Ройтерс агентлиқиниң бу һәқтики хәвиридин мәлум болушичә, хитай ишлигән токлуқ аптомобиллар америка базирида анчә зор салмақни игилимигәнлики үчүн, буниң америка тәвәсидики истемалчиларға көрситидиған тәсири анчә чоң болмайдикән. Шуниңдәк бу тәдбир өз нөвитидә америка аптомобил базирини муһапизәт қилишта муһим рол ойнайдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.