Amérika hökümiti soda urushining yéngi qedimini aldi

Washin'gtondin muxbirimiz eziz teyyarlidi
2024.05.14

Amérika-xitay otturisidiki soda urushida dawam qiliwatqan tirkishish we bir izda turup qélish weziyiti 14-may küni yéngi bir sehipige yötkeldi. Amérika pirézidénti jow baydén xitaydin import qilinidighan bir qisim tawarlargha qoyulidighan tamozhna béjini östüridighanliqini resmiy élan qildi. Buningda éléktr quwwetlik aptomobillargha 100 pirsent baj qoyushtin bashqa alyumin, polat, yérim ötküzgüch qatarliqlargha hessilep baj qoyulidighanliqi békitildi. Buning bilen sabiq pirézidént donald tramp dewride bashlan'ghan “Xitay tawarlirigha qarita tamozhna béjini östürüsh” herikiti yéngi bir sewiyege yükseldi.

Aqsarayning bu heqtiki bayanatida buningdiki asasliq sewebler heqqide toxtilip, “Biz xitayning yillardin buyan tengsiz soda pa'aliyiti arqiliq amérika iqtisadigha we dölet bixeterlikige tehdit peyda qilishigha, shuningdek eqliy mülük oghriliqi, téxnologiye we ijadchanliq sahelirige nisbeten endishilerni köpeytishige qarap turalmaymiz” déyilgen. Shuningdek deslepki qedemde xitaydin import qilin'ghan 18 milyard amérika dolliriliq malgha qoyulidighan tamozhna béjining östürülgenlikini eskertilgen.

“Nyu-york waqti” gézitining 14-maydiki obzor maqaliside körsitilishiche, donald trampning soda urushi asasliq zawutlarni xitaydin amérika tewesige yandurup kélishni közligen bolsa, jow baydénning soda urushi amérika teweside pakiz énérgiyege oxshash yuqiri pen-téxnikaliq sana'etlerning ishlepchiqirish we xizmet kölimini ashurushni nishan qilghan.

Roytérs agéntliqining bu heqtiki xewiridin melum bolushiche, xitay ishligen tokluq aptomobillar amérika bazirida anche zor salmaqni igilimigenliki üchün, buning amérika tewesidiki istémalchilargha körsitidighan tesiri anche chong bolmaydiken. Shuningdek bu tedbir öz nöwitide amérika aptomobil bazirini muhapizet qilishta muhim rol oynaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.