Президент трамп хитайниң 300 милярд долларлиқ мәһсулатиға таможна беҗи қойидиғанлиқини елан қилди

Мухбиримиз әркин
2019-08-02
Елхәт
Пикир
Share
Принт

Бейҗиңда өткүзүлгән америка-хитай сода сөһбитиниң нәтиҗиси ахирлишиши билән икки тәрәп оттурисидики сода уруши қайтидин җиддийлишишкә башлиди.

Америка президенти доналд трамп 1‏-авғуст күни тивиттерда учур йоллап, хитайниң қәп қалған 300 милярд долларлиқ импорт мәһсулатиға 10 пирсәнт таможна беҗи қойидиғанлиқини елан қилған. Униң илгири сүрүшичә, 10пирсәнт таможна беҗи бу йил 1‏-сентәбирдин башлап иҗра қилинидикән.

Президент трамп буниңдин бурун хитайниң 250‏ милярд долларлиқ мәһсулатиға баҗ қойған иди. Әгәр униң қарари 9‏-айда иҗра қилинишқа башлиса хитайниң америкаға експорт қилидиған барлиқ мәһсулатлириға таможна беҗи қоюлған болиду. У тивиттерда елан қилған учурида «әсли биз ‏3‏-айниң алдида хитай билән сода келишими имзалашни ойлиған. Бирақ кишини әпсусландурғини шуки, хитай келишимгә имза қоюштин бурун қайта сөһбәт елип беришни тәләп қилди.

Трамп «хитай техи йеқиндила зор миқдарда американиң деһқанчилиқ мәһсулатлирини сетивелишни қарар қилған болсиму, әмма сетивалмиди» дегән. Президент трампниң илгири сүрүшичә, илгири ши җинпиң униңға америкаға зәһәрлик мадда‏-фәнтанил сетишни тохтитидиғанлиқини билдүргән болсиму, лекин хитай бу вәдисигә әмәл қилмиған. Трамп йәнә ши җинпиңниң америка билән сода келишими имзалашқа алдиримайватқанлиқи, лекин хитай америка билән сода қилмиған тәқдирдиму буниң америка үчүн чоң мәсилә әмәсликини тәкитлигән.

Президент трамп юқириқи сөзләрни 12‏-нөвәтлик америка-хитай сода сөһбити пәйшәнбә күни шаңхәйдә нәтиҗисиз ахирлишип арқидинла қилған. Хитай һөкүмити 2‏-авғуст күни президент трампниң қарариға инкас билдүрүп, әгәр америка 10 пирсәнт таможна беҗи елишқа башлиса, хитайниң тегишлик өч елиш тәдбирлирини қоллинидиғанлиқини билдүргән. Әмма қандақ тәдбир қоллинидиғанлиқини чүшәндүрмигән.

Пикирләр (0)
Share
Толуқ бәт