Prézidént tramp 200 milyard dollarliq xitay mehsulatigha baj qoyushni telep qilghan

Amérika prézidénti donald tramp kéler hepte ichide yene 200 milyard dollarliq xitay éksport mehsulatigha tamozhna béji qoyushni telep qilghan. Amérika “Blumbérg xewerliri” agéntliqining peyshenbe küni weqedin amérika hökümet emeldarliridin neqil keltürüshiche, prézidént tramp yardemchilirige tamozhna béji qoyushni 6‏-séntebirdin kéyin derhal yolgha qoyushni tekitligen.

Prézidént tramp ilgiri mezkur mesilini bu yil 6‏-séntebirgiche amérika jama'et pikirining munazire qilishigha sun'ghan idi.

Amérika fokus xewerliri téléwiziye qanilining buningdin sel awwal bergen xewiride, tramp hökümitining 5‏-séntebirdin kéyin xitayning yémek-ichmek mehsulatliridin tartip aptomobil chaqighiche bolghan éksport mehsulatlirigha 25 pirsent baj qoyulushi mumkinlikini bildürgen.

Roytérsning jüme küni xewiride bayan qilishiche, aqsaray prézidént trampning pat arida xitay mehsulatlirigha yene baj qoyidighanliqi heqqidiki xewerlerge inkas qayturushni ret qilghan. Halbuki, uchur menbeliri “Blumbérg xewerliri” ge bergen uchurida, buninggha téxi axirqi xulase emesliki, tamozhna béjining qisimlargha bölüp ijra qilinishi we kéler hepte élan qilinip, kéyinki künlerde ijra qilinishi mumkinlikini bildürgen.

Xewerde tekitlishiche, yéngi tamozhna béjining amérika-xitay arisidiki soda urushini téximu kücheytidiken. 

Prézidént tramp ilgiri xitayning bazirini échiwétip, amérikining sodidiki 375 milyard dollarliq qizil reqimi azaytishini, xitay mehsulatlirigha qoshumche yardem bérishni toxtitishni, we amérika karxanilirining eqliy mülk hoquqigha hörmet qilishni telep qilghan. U yéqinda roytérs agéntliqining ziyaritini qobul qilip, “Xitay bilen bolghan soda ixtilapini hel qilishqa waqit kétidighanliqi” ni bildürgen idi.