Amérika xitaydiki eng chong yérim ötküzgüch ishlep chiqarghuchidin munasiwitini üzmekchi

Muxbirimiz jüme
2020-09-06
Élxet
Pikir
Share
Print

Amérika hökümiti xitaydiki eng chong yérim ötküzgüch ishlep chiqarghuchi - xitay éléktron téxnologiye guruhi bilen soda munasiwitini üzüshni oylashmaqta iken.

"Washin'gtondin pochisi géziti" ning amérika dölet mudapi'e ministirliqining bu heqtiki uchurliridin neqil élip xewer qilishiche, tramp hökümiti xitayning "Yérim ötküzgüch ishlepchiqirish xelq'ara guruhi" ni qara tizimlikke kirgüzüsh mesilini muzakire qilmaqta iken.

Xewerde körsitishiche, bu amérika-xitay arisidiki téxnologiye munasiwetlirining téximu jiddiyleshkenlikining alamiti iken.

Xewerge qarighanda, eger xitayning mezkur shirkiti amérikaning mu'essese tizimlikige kirgüzülse mezkur shirketning mehsulatlirini amérikida sétish ishi teslishidiken. Bu shirketning mehsulatliri üstidin élip bérilidighan tekshürüsh kücheytilip, shirket amérikigha mal kirgüzüsh üchün alahide ijazetname iltimas qilishqa toghra kélidiken.

Roytérisning xewer qilishiche, dölet mudapi'e ministirliqi bayanatchisi suéi gogh eger shundaq tedbir qollinilidighan bolsa, xitay yérim ötküzgüch shirkitining téximu tepsiliy tekshürüshtin ötidighanliqini bildürgen.

Emma u tekshürüshning sewebi heqqide izahat bermigen.

Xewerge qarighanda, "SOS Xelq'ara shirkiti" dep atilidighan amérikida dölet mudapi'e sahesining toxtamliq höddigiri ötken ay élan qilghan bir doklatida xitay yérim ötküzgüch yasash shirkitining xitay dölet mudapi'e tarmaqliri bilen munasiwiti barliqini, bolupmu herbiy éléktoronluq mehsulat yasash shirkiti "CETC" yeni xitay éléktron téxnologiye guruhi bilen uzun yillardin buyan yéqin munasiwetni saqlap kelgenlikni bildürgen.

Melum bolushiche, "CETC" yeni xitay éléktron téxnologiye guruhi 2016-yili amérika soda ministirliqining qara tizimlikige élin'ghan xitay shirkitining biri iken.

"Mu'essese tizimliki" yeni "Qara tizimlik" amérika hökümitining amérikida soda qilishi yaki amérika yuqiri téxnikilirini ishlitishi cheklen'gen shirket, organ we hökümet mu'‍essesilirining tizmini körsitidu.

Ötken yilidin buyan Uyghur élidiki kishilik hoquq depsendichilikide rol alghan 30 din artuq xitay shirkiti amérikining mezkur qara tizimlikige kirgüzülgen we ularning amérikaning yuqiri téxnikilirini sétiwélishi cheklen'gen idi.

Toluq bet