Иқтисадшунаслар американиң хитай ширкәтлирини кишилик һоқуқ сәвәблик җазалиши сода сөһбитидә американи күчләндүриду, дәп қарайдикән

Мухбиримиз ирадә
2019-10-11
Елхәт
Пикир
Share
Принт

10-Өктәбир пәйшәнбә күни, америка-хитай арисидики сода сөһбити вашингтонда башланди. Мәзкур сөһбәткә хитайниң муавин баш министири люхи башчилиқидики бир қатар юқири дәриҗилик һөкүмәт әмәлдарлири вә иқтисадшунаслиридин тәркиб тапқан бир һәйәт қатнашқан. Бу йиғиндин қандақ нәтиҗә чиқидиғанлиқи диққәт билән көзитилмәктә.

«CNBC» Телевизийәсиниң хәвиридә көрситилишичә, гәрчә америка-хитай икки тәрәп сода сөһбити арқилиқ содидики ихтилапни түгитишни мәқсәт қилсиму, әмма американиң хитайниң 28 ширкәт вә җамаәт хәвпсизлик оргиниға уйғур елидики кишилик һоқуқ кризиси сәвәблик җаза тәдбири қоюши мунасивәтни йәниму җиддийләштүргән. Хәвәрдә ейтилишичә, нурғун иқтисадшунаслар америка-хитай арисидики сода сөһбитидә пәвқуладдә бир нәтиҗә чиқиду, дәп қаримаслиқ билән биргә, американиң кишилик һоқуқ мәсилисигә қайтурған юқиридики инкасиниң икки тәрәп арисидики сөһбәтләрдә американиң күчлүк орунда турушиға имкан яритип беридиғанлиқиға ишинидикән. 

Хәвәрдә баян қилинишичә, иқтисадшунаслар йәнә, америка трамп һөкүмитиниң уйғур қатарлиқ йәрлик милләтләрниң кишилик һоқуқини дәпсәндә қиливатқан вә униңға янтаяқ болған орган вә ширкәтләрни җазалимақчи болуши униң хитай билән болған зиддийәтни содидин башқа саһәләргә кеңәйтидиғанлиқиниң ипадиси, дәп мөлчәрлимәктикән. 

Хитайниң хәлқаралиқ содида қоллинип кәлгән позитсийисини түптин өзгәртиш америка трамп һөкүмитиниң нишани болуп, американиң бу һәқтә явропа иттипақи вә униңға әза дөләтләрниму өзигә қошулушқа чақирип кәлмәктә. 10-Өктәбир күни явропа иттипақиму хитайдин импорт қилинидиған полат чивиқларға қоюлидиған баҗни 66. 4% Өстүргән болуп, буниңға хитайдики полат чивиқ ишләп чиқиридиған ширкәтләрниң полат чивиқларни нормалдин көп төвән баһада експорт қилиш арқилиқ, германийә, фирансийә, испанийә вә чех қатарлиқ дөләтләрдики йәрлик ишләп чиқарғучиларни еғир зиянға учритиши сәвәб болған икән.

Пикирләр (0)
Share
Толуқ бәт