Iqtisadshunaslar amérikaning xitay shirketlirini kishilik hoquq seweblik jazalishi soda söhbitide amérikani küchlendüridu, dep qaraydiken

Muxbirimiz irade
2019-10-11
Élxet
Pikir
Share
Print

10-Öktebir peyshenbe küni, amérika-xitay arisidiki soda söhbiti washin'gtonda bashlandi. Mezkur söhbetke xitayning mu'awin bash ministiri lyuxi bashchiliqidiki bir qatar yuqiri derijilik hökümet emeldarliri we iqtisadshunasliridin terkib tapqan bir hey'et qatnashqan. Bu yighindin qandaq netije chiqidighanliqi diqqet bilen közitilmekte.

"CNBC" téléwiziyesining xewiride körsitilishiche, gerche amérika-xitay ikki terep soda söhbiti arqiliq sodidiki ixtilapni tügitishni meqset qilsimu, emma amérikaning xitayning 28 shirket we jama'et xewpsizlik orginigha Uyghur élidiki kishilik hoquq krizisi seweblik jaza tedbiri qoyushi munasiwetni yenimu jiddiyleshtürgen. Xewerde éytilishiche, nurghun iqtisadshunaslar amérika-xitay arisidiki soda söhbitide pewqul'adde bir netije chiqidu, dep qarimasliq bilen birge, amérikaning kishilik hoquq mesilisige qayturghan yuqiridiki inkasining ikki terep arisidiki söhbetlerde amérikaning küchlük orunda turushigha imkan yaritip béridighanliqigha ishinidiken. 

Xewerde bayan qilinishiche, iqtisadshunaslar yene, amérika tramp hökümitining Uyghur qatarliq yerlik milletlerning kishilik hoquqini depsende qiliwatqan we uninggha yantayaq bolghan organ we shirketlerni jazalimaqchi bolushi uning xitay bilen bolghan ziddiyetni sodidin bashqa sahelerge kéngeytidighanliqining ipadisi, dep mölcherlimektiken. 

Xitayning xelq'araliq sodida qollinip kelgen pozitsiyisini tüptin özgertish amérika tramp hökümitining nishani bolup, amérikaning bu heqte yawropa ittipaqi we uninggha eza döletlernimu özige qoshulushqa chaqirip kelmekte. 10-Öktebir küni yawropa ittipaqimu xitaydin import qilinidighan polat chiwiqlargha qoyulidighan bajni 66. 4% Östürgen bolup, buninggha xitaydiki polat chiwiq ishlep chiqiridighan shirketlerning polat chiwiqlarni normaldin köp töwen bahada éksport qilish arqiliq, gérmaniye, firansiye, ispaniye we chéx qatarliq döletlerdiki yerlik ishlep chiqarghuchilarni éghir ziyan'gha uchritishi seweb bolghan iken.

Toluq bet