Pirézidént baydénning xitay tehditi tüpeylidin yadro qorallar istratégiyesini testiqlighanliqi melum boldi

“Nyu-york waqti géziti” ning 21-awghusttiki xewiride éytilishiche, amérika pirézidénti jow baydén 2024-yili mart éyidila amérika armiyesige yadro qoralliri orunlashturmisini xitayni merkez qilghan halda tengsheshke buyruq bergen. Pirézidént baydénning bu heqtiki testiqi mutleq mexpiy höjjet sheklide tarqitilghan bolup, xitay tehditining bu xil yéngi orunlashturmigha seweb bolghanliqi alahide eskertilgen.

Xewerde éytilishiche, baydénning aqsaraydin ayrilish waqti yéqinlap qalghanda, yuqiri derijilik ikki neper emeldar bu heqte omumiy shekilde chüshenche bérishke ruxset alghan. Besh burjeklik bina (amérika dölet mudapi'e ministirliqi) ning yadro qorallirigha mes'ul emeldarliridin waypin narang (Vipin Narang) bu heqtiki ehwallarni tonushturup, “Xitayning künsayin éship bériwatqan yadro qoralliri kéngeymichiliki buningdiki eng asasliq seweb hésablinidu” dégen.

Xewerde éytilishiche, ilgiriki waqitlarda amérika üchün düshmen saniliwatqanlarning yadro qoralliri tehditi arqiliq amérika armiyesini bésip chüshüsh éhtimalliqi yoqning ornida bolup kelgen. Emma yéqinqi mezgillerdiki rusye-xitay ittipaqining küchiyishi, shimaliy koréye we iranning ukra'ina urushida rusiyege hemdem bolushi amérika üchün yéngi bir istratégiye muhiti peyda qilghan. Yene kélip rusiye we xitayning birlikte herbiy manéwir qilip turuwatqanliqi, bolupmu xitayning yéqinqi bir nechche yilda yadro qorallirini amérika istixbarat da'iriliri perez qilghan sür'ettinmu téz bolghan sür'ette ghayet zor küch bilen kéngeytiwatqanliqi amérika üchün yéngi endishilerni peyda qilghan. Bu hal amérika armiyesining yillardin buyan yadro qorallirini rusiyeni merkez qilip orunlashturush isxémisini pütünley buzup tashlighan.