Amérika, yaponiye we filippin rehberlirining uchrishishi xitaygha bérilgen signal dep bahalanmaqta

Washin'gtondin muxbirimiz irade teyyarlidi
2024.04.11

Amérika pirézidénti jow baydin 10-aprél küni yaponiye bash weziri fumi'o kishida bilen körüshken we uni dölet ziyapiti bilen kütüwalghan.

CNN Téléwiziyesining xewer qilishiche, jow baydin amérikaning yaponiye bilen bolghan munasiwitige yüksek baha bérip “Oxshash qimmet qarashqa ige bolghan ikki démokratik döletning hemkarliqining hazir herqandaq waqittikidin bek küchlüklükini” bildürgen.

Melum bolushiche, ikki terepning uchrishishida hindi-tinch okyan rayonining muqimliqi hemde xitayning herbiy we iqtisadiy tajawuzchiliqi nuqtiliq muzakire qilin'ghan, shundaqla uchrishishning bir qismi süpitide halqiliq sahelerni öz ichige alghan 70 nechche tür boyiche hemkarliq türi élan qilin'ghan. Ular, yaponiyede turushluq amérika armiyesining qurulmisini özgertish we yaponiye bilen amérika armiyesining bir gewdilishish derijisini yuqiri kötürüsh؛ “Herbiy sana'et kéngishi” qurup, ikki döletning mudapi'e qorallirini hemkarlashturushning yollirini izdesh؛ amérika, awstraliye we yaponiye otturisidiki bashqurulidighan bombigha qarshi mudapi'e sistémisini kücheytish qatarliqlarni öz ichige alidiken.

 “Nyu-york waqti géziti” ning bildürüshiche, amérika pirézidénti jow baydin bügün yeni, 11-aprél peyshenbe küni yaponiye bash weziri fumi'o kishida we filippin pirézidénti férdinand markos jir qatarliqlar bilen aq sarayda 3 tereplik söhbet élip baridighan bolup, söhbetning merkizi nuqtisi xitayning jenubiy déngizdiki zomigerlik heriketlirige qarshi turush üchün bu déngizning erkin we ochuqluqigha kapaletlik qilish heqqide bolidiken. Bu uchrishish xitaygha bérilgen ochuq signal bolup hésablinidiken.

Melum bolushiche, bu üch rehberning uchrishishidin kéyin, ular filippindiki port, tömür yol, pakiz énérgiye we yérim ötküzgüch teminlesh zenjiri qatarliq “Yuqiri ünümlük” türlerni yaxshilashni meqset qilghan ul eslihe türlirige meblegh sélish hemde üch dölet otturisidiki herbiy hemkarliqni ashurushqa munasiwetlik yéngi qararlarni élan qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.