Америка дөләт мудапиә министири пит хегсет: “бизму хитай билән урушушқа тәйяр”

Америка дөләт мудапиә министири пит хегсет (Pete Hegseth) 5-март күни “фокс хәвәрлири” ниң зияритини қобул қилғанда, америка тәрәпниң хитай билән уруш қилишқа тәйярлиқ көргәнликини тилға алған һәмдә “биз хитай билән һәрқандақ шәкилдә уруш қилишқа тәйяр” дегән.

“ню-йорк почтиси” гезитиниң бу һәқтики хәвиридә ейтилишичә, пит хегсет бу сөзләрни хитай һөкүмити пирезидент трампниң йеңи таможна беҗи лайиһәсигә қарита тәһдит арилаш җаваб қайтурғандин кейин оттуриға қойған. Мәлум болушичә, хитайниң америка қошма иштатлири (а қ ш)дики баш әлчиханиси 4-март күни өзлириниң X тики һесабатида учур йоллап, “америка арзу қилған уруш таможна уруши, сода уруши яки башқа һәрқандақ типтики уруш болушидин қәтийнәзәр, биз ахириғичә җәң қилишқа тәйяр” дегән.

Америка дөләт мудапиә министири пит хегсет бу һәқтә мухбирниң соалиға җаваб берип, “тинчлиққа тәшна болған адәм җәзмән урушқа тәйяр болуши керәк. Буниң үчүн күчлүк болуш әң муһим. Чүнки тинчлиқ күчлүклүктин келиду” дәп көрсәткән. У йәнә хитай билән болидиған урушни көздә тутуп америка һөкүмитиниң зор көләмлик армийә қурулуши қиливатқанлиқини әскәрткән.

Әнглийәдики “күндилик почта” гезитиниң бу һәқтики хәвиридә ейтилишичә, хитай һөкүмити мушу һәптидә өзлириниң мудапиә хамчотини 7.2 Пирсәнт ашуридиғанлиқини җакарлиған һәмдә дуня вәзийитидики җиддий өзгиришләр түпәйлидин өзлириниң армийәни заманивилаштурушқа моһтаҗ икәнликини тәкитлигән.

Дәрвәқә, пит хегсет күчлүк рәвиштә хитай һөкүмитигә җаваб қайтурғандин кейин, хитай ташқи ишлар министирлиқи үзәңгидин чүшкән. Уларниң баянатчиси лин җйән бу һәқтә сөз қилип, “америка әмәлдарлири һазир идеологийәлик тоқунушқа от қуйруқлуқ қиливатиду, шундақла задила мәвҗут болмиған ‛хитай тәһдити‚ нәзәрийәсини базарға селиватиду” дегән.