Amérika dölet mudapi'e ministiri pit xégsét: “Bizmu xitay bilen urushushqa teyyar”

Amérika dölet mudapi'e ministiri pit xégsét (Pete Hegseth) 5-mart küni “Foks xewerliri” ning ziyaritini qobul qilghanda, amérika terepning xitay bilen urush qilishqa teyyarliq körgenlikini tilgha alghan hemde “Biz xitay bilen herqandaq shekilde urush qilishqa teyyar” dégen.

“Nyu-york pochtisi” gézitining bu heqtiki xewiride éytilishiche, pit xégsét bu sözlerni xitay hökümiti pirézidént trampning yéngi tamozhna béji layihesige qarita tehdit arilash jawab qayturghandin kéyin otturigha qoyghan. Melum bolushiche, xitayning amérika qoshma ishtatliri (a q sh)diki bash elchixanisi 4-mart küni özlirining X tiki hésabatida uchur yollap, “Amérika arzu qilghan urush tamozhna urushi, soda urushi yaki bashqa herqandaq tiptiki urush bolushidin qet'iynezer, biz axirighiche jeng qilishqa teyyar” dégen.

Amérika dölet mudapi'e ministiri pit xégsét bu heqte muxbirning so'aligha jawab bérip, “Tinchliqqa teshna bolghan adem jezmen urushqa teyyar bolushi kérek. Buning üchün küchlük bolush eng muhim. Chünki tinchliq küchlüklüktin kélidu” dep körsetken. U yene xitay bilen bolidighan urushni közde tutup amérika hökümitining zor kölemlik armiye qurulushi qiliwatqanliqini eskertken.

En'gliyediki “Kündilik pochta” gézitining bu heqtiki xewiride éytilishiche, xitay hökümiti mushu heptide özlirining mudapi'e xamchotini 7.2 Pirsent ashuridighanliqini jakarlighan hemde dunya weziyitidiki jiddiy özgirishler tüpeylidin özlirining armiyeni zamaniwilashturushqa mohtaj ikenlikini tekitligen.

Derweqe, pit xégsét küchlük rewishte xitay hökümitige jawab qayturghandin kéyin, xitay tashqi ishlar ministirliqi üzenggidin chüshken. Ularning bayanatchisi lin jyen bu heqte söz qilip, “Amérika emeldarliri hazir idé'ologiyelik toqunushqa ot quyruqluq qiliwatidu, shundaqla zadila mewjut bolmighan ‛xitay tehditi‚ nezeriyesini bazargha séliwatidu” dégen.