Америкалиқ хитайларниң хитайни яхши көрүш нисбити төвән икән

Йеқинда “бүгүнки америка” (USA Today) торида елан қилинған бир мақалидә, америкада омумйүзлүк елип берилған бир рай синаш нәтиҗиси муһакимә қилинған. Униңда ейтилишичә, асиядин кәлгән америкалиқларниң өз дөлитини яхши көрүш нисбитидә хитай әң төвән чиққан, аз нисбәттики америкалиқ хитайларла хитайни яхши көридиғанлиқини ейтқан.

Бу рай синаш 2022-йил 7-айдин 2023-йил 1-айғичә елип берилған болуп, хитай, һиндистан, японийә, корейә, филиппин, тәйвән, вийетнам қатарлиқ дөләтләрдин көчмән болған асиялиқ америкалиқтин 7000 адәм рай синашқа қатнашқан. Рай синаш нәтиҗисидә, хитайлар билән вийетнамлиқлардин болған америкалиқлар башқа дөләтләрни өз дөлитидин яхши дәп қариған. Америкалиқ хитайлар ичидә тәйвәнни чоң қуруқлуқтин яхши дәп қарайдиғанлар көпрәк болған.

Мақалидә көрситилишичә, рай синаш нәтиҗисиниң бундақ болушидики сәвәб, америкадики асиялиқ көчмәнләрниң 60 пирсәнти чәт әлдә туғулған болуп, уларниң һәммисиниң дегүдәк мустәбит һакимийәттин қечиштәк тарихи бар икән. Хитайларға кәлсәк, уларниң көпинчиси “мәдәнийәт зор инқилаби” вә “тйәнәнмеин қирғинчилиқи” дин кейин коммунист хитайниң зулумдин қечип чиққанлар болуп, хитайдики кишилик һоқуқ дәпсәндичилики, хоңкоңдики бастуруш, ковид мәзгилидики қамал сиясити қатарлиқларму уларда үмидсизлик вә нәпрәт пәйда қилған.

Униңдин башқа, америкалиқлар ичидә елип берилған рай синаштиму, уларниң толисиниң хитайға нисбәтән сәлбий көз қарашта икәнлики мәлум болған.