Американиң иран билән болған тоқунуши муһаҗирәттики уйғурларни әндишигә салмақта

Мухбиримиз әркин
2020-01-03
Елхәт
Пикир
Share
Принт

Американиң бир адәмсиз уруш айропилани 2‏-декабир күни бағдат хәлқара айродроминиң әтрапида иран ислам инқилабий муһапизәтчиләр қисимиға қарашлиқ қуддус бригадасиниң қомандани қасим сулайманини һава һуҗумида өлтүргән.

Һуҗумда ирақ шиә қораллиқ гуруһи ‏- һашди шабиниң муавин қомандани абу мәһди әл муһәндисму тәң өлтүрүлгән. Қасим сулаймани вә униң қоманданлиқидики қуддус бригадаси ирақ, сүрийә, йәмән, ливан қатарлиқ оттура-шәрқ дөләтлиридики нурғун қораллиқ вәқәләрдә вә террорлуқ һуҗумлирида җавабкарлиқи бар, дәп әйиблинип кәлгән. 

Америка һөкүмити өткән йили иран ислам инқилаби муһапизәтчилири вә униң қуддус бригадасини «терорлуқ тәшкилатлар тизимлики» гә киргүзгән иди. Америка ташқий ишлар министири майк помпейо 3‏-декабир CNN ниң зияритини қобул қилғанда американиң бу һәрикити арқилиқ қасим сулаймани пиланлиған бир суйиқәстниң алдини алғанлиқи, әгәр америка кәскин тәдбир қолланмиған болса, онлиған яки йүзлигән америкалиқниң өлүши мумкинликини билдүргән. У йәнә әгәр униң һуҗум пилани әмәлгә ашқан болса «нурғун мусулманларниң, ирақлиқларниң вә башқа дөләт хәлқлириниң өлүши мумкинлики» ни илгири сүргән. Әмма қасим сулайманиниң бу һуҗумни қачан вә қәйәрдә елип беришни пиланлиғанлиқини чүшәндүрмигән. 

Бу вәқә пүтүн дуняниң диққити хитай һөкүмити2017‏-йили башлиған тутқунда лагерларға қамалған 3 милйондәк уйғур, қазақ вә башқа мусулманларниң мәсилисигә буралған мәзгилдә йүз бәрди. Бәзи уйғур көзәткүчиләр дуняниң диққитиниң иранға бурулуши хитайға пурсәт яритип, лагерлар мәсилисидики бесимни пәсәйтишидин әндишә қилмақта.

Америка PBS телевизийә қанилиниң хәвәр қилишичә, майк помпейо 3-январ күни әнглийә вә германийәниң ташқий ишлар министерлири һәмдә хитайниң дөләт ишлири комиссари яң җйечи билән телефонда сөзләшкән. Сөһбәтниң конкрет мәзмуни ениқ болмисиму, лекин у бу дөләтләргә американиң оттура-шәрқтики җиддийчиликни пәсәйтишни халайдиғанлиқини билдүргән.

Пикирләр (0)
Share
Толуқ бәт