Amérikaning iran bilen bolghan toqunushi muhajirettiki Uyghurlarni endishige salmaqta

Muxbirimiz erkin
2020-01-03
Élxet
Pikir
Share
Print

Amérikaning bir ademsiz urush ayropilani 2‏-dékabir küni baghdat xelq'ara ayrodromining etrapida iran islam inqilabiy muhapizetchiler qisimigha qarashliq quddus brigadasining qomandani qasim sulaymanini hawa hujumida öltürgen.

Hujumda iraq shi'e qoralliq guruhi ‏- hashdi shabining mu'awin qomandani abu mehdi el muhendismu teng öltürülgen. Qasim sulaymani we uning qomandanliqidiki quddus brigadasi iraq, süriye, yemen, liwan qatarliq ottura-sherq döletliridiki nurghun qoralliq weqelerde we térrorluq hujumlirida jawabkarliqi bar, dep eyiblinip kelgen. 

Amérika hökümiti ötken yili iran islam inqilabi muhapizetchiliri we uning quddus brigadasini "Térorluq teshkilatlar tizimliki" ge kirgüzgen idi. Amérika tashqiy ishlar ministiri mayk pompéyo 3‏-dékabir CNN ning ziyaritini qobul qilghanda amérikaning bu herikiti arqiliq qasim sulaymani pilanlighan bir suyiqestning aldini alghanliqi, eger amérika keskin tedbir qollanmighan bolsa, onlighan yaki yüzligen amérikaliqning ölüshi mumkinlikini bildürgen. U yene eger uning hujum pilani emelge ashqan bolsa "Nurghun musulmanlarning, iraqliqlarning we bashqa dölet xelqlirining ölüshi mumkinliki" ni ilgiri sürgen. Emma qasim sulaymanining bu hujumni qachan we qeyerde élip bérishni pilanlighanliqini chüshendürmigen. 

Bu weqe pütün dunyaning diqqiti xitay hökümiti2017‏-yili bashlighan tutqunda lagérlargha qamalghan 3 milyondek Uyghur, qazaq we bashqa musulmanlarning mesilisige buralghan mezgilde yüz berdi. Bezi Uyghur közetküchiler dunyaning diqqitining iran'gha burulushi xitaygha purset yaritip, lagérlar mesilisidiki bésimni peseytishidin endishe qilmaqta.

Amérika PBS téléwiziye qanilining xewer qilishiche, mayk pompéyo 3-yanwar küni en'gliye we gérmaniyening tashqiy ishlar ministérliri hemde xitayning dölet ishliri komissari yang jyéchi bilen téléfonda sözleshken. Söhbetning konkrét mezmuni éniq bolmisimu, lékin u bu döletlerge amérikaning ottura-sherqtiki jiddiychilikni peseytishni xalaydighanliqini bildürgen.

Toluq bet