«Нюйорк вақти» гезити: «бу йәрдә немә үчүн дәйдиған соал йоқ»

Мухбиримиз сада
2019-04-16
Елхәт
Пикир
Share
Принт

Хитай һөкүмитиниң уйғур диярида елип бериватқан еғир бастуруш вә қаттиқ тәқиб сиясәтлири иҗтимаий таратқулар арқилиқ хәлқараға ашкара болуватқан бир пәйттә, уйғур диярида зиярәттә болған «нюйорк вақти» гезити мухбириниң зиярәт хатириси шу йәрдики вәзийәтни техиму әйнән йорутуп бәргән.

«Нюйорк вақти» гезитиниң 16-апрелдики хәвиригә қариғанда, мухбир паул мозур қәшқәр шәһиридә төт күн зиярәттә болған болуп, бу җәрянда йәттә нәпәр хитай сақчиси изчил униң изиға чүшкән. 

Хәвәрдин мәлум болушичә, паул мозур йәрлик аһалиләр билән пикир алмаштурушқа урунған болсиму, һалбуки хитай сақчилар буниңға тосалғулуқ қилған. Улар уни «тәкшүрүш понкитлири» да тохтитип, қол-телефонлирини тәкшүргән вә ичидики рәсим вә син-көрүнүшләрни өчүрүвәткән.

Униң дейишичә, қәшқәр шәһириниң ичидики һәрқандақ йәргә бериш үчүн, чоқум «тәкшүрүш понкити» дин өтиши шәрт икән. Бу хил понкитта бир «йешил йол» бар болуп, бу йол мәхсус саяһәтчиләр вә хитай аһалиләр үчүн ясалған икән, улар кимликсиз өтүп кетәләйдикән, әмма уйғурлар чоқум кимликни көрситиши шәрт икән. 

Мухбирниң баянлиридин мәлум болушичә, паул мозур өзиниң бир хизмәтдиши билән машина иҗарә елип саяһәт қилмақчи болғанда, хитай сақчилар аталмиш «қатнаш вәқәси» ни сәвәб қилип, йолни тосувалған. Униң баянлиридики бир қизиқ нуқта шуки, «қатнаш вәқәси» пәйда қилған үч машининиң һәммиси бир йөлиништә тохтитип қоюлған болуп, сиртида һечқандақ соқулған из йоқ икән. 

У мундақ дәйду: «бир күни бир хитай сақчи бизни йолда тосувалди вә хизмәтдишимниң қол-телефонини тәкшүрүп, ичидики бир төгиниң сүритини өчүрүвәтти. Хизмәтдишим сәвәбини сориғинида, у сақчи җавабән, ‹хитайда немә үчүн дәйдиған соал йоқ' деди.»

Пикирләр (0)
Share
Толуқ бәт