Xelq'ara kechürüm teshkilatining amérika shöbisi Uyghurlargha munasiwetlik ikki qanun layihisini qollashni qarar qildi

• Muxbirimiz irade
  2019-02-14

Xelq'ara kechürüm teshkilatining amérika shöbisi özining ikki milyondin oshuq ezasi we qollighuchilirini heriketke keltürüsh arqiliq Uyghurlargha munasiwetlik ikki qanun layihisini qollashni qarar qildi.

Xelq'ara kechürüm teshkilatining bayanatidin qarighanda, bu qanun layiheliri sénator marko rubiyo bashchiliqida tonushturulghan ““Uyghur kishilik hoquq siyasiti-2019” we shundaqla dölet mejlis ezasi bred shérmin bashchiliqida tonushturulghan “Uyghur qanuni” din ibaret iken. 

Xelq'ara kechürüm teshkilati xitay hökümitining bir milyondin oshuq Uyghur we bashqa milletlerni “Qayta terbiyilesh lagérliri” gha tutqun qilish arqiliq xelq'ara kishilik hoquq qanunlirini éghir derijide depsende qilghanliqini eskertken we amérika dölet mejlis ezalirini “Hazirqi bu achquchluq kishilik hoquq mesilisini hel qilish üchün yuqiriqi qanun layihilirini qilchimu ikkilenmey turup maqullash” qa chaqirghan. 

Xelq'ara kechürüm teshkilati dunya miqyasida Uyghur élidiki ata-ana, uruq-tughqanliri lagérgha tutulghan yaki ular bilen alaqisi késilgen 100 din oshuq kishi bilen sözleshken we bu heqte “Ular qeyerde” témisida mexsus doklat élan qilghan. 

Chet'ellerdiki Uyghur közetküchilerning qarishiche, xelq'aradiki nopuzluq organlardin bolghan kechürüm teshkilatining yuqiriqi bu qarari Uyghur dawasidiki muhim burulush nuqtilirining biri bolup, uning ehmiyiti zor iken.