Хитай ишлири комитети: «хитай һөкүмитиниң инсанийәткә қарши җинайәт садир қиливатқанлиқиға даир күчлүк пакитлар бар»

Мухбиримиз ирадә
2020-01-08
Елхәт
Пикир
Share
Принт

Америка дөләт мәҗлиси қармиқидики хитай ишлири комитети 8-январ күни елан қилған йиллиқ доклатида «хитай һөкүмитиниң инсанийәткә қарши җинайәт садир қиливатқанлиқиға даир күчлүк пакитлар бар», дәп көрсәтти.

Уйғур елиниң вәзийити хитай ишлири комитетиниң хитайниң кишилик һоқуқ вә қанунниң иҗра қилиниш вәзийити баһалап чиқилидиған бу йиллиқ доклатидин айрим бир сәһипә сүпитидә орун алған болуп, буниңда «комитетимиз хитай һөкүмитиниң районда уйғурлар вә башқа мусулман түркий милләтләр үстидин ‹инсанийәткә қарши җинайәт' садир қиливатқанлиқиға ишиниду» дәп йезилған. 

Доклатта йәнә, хитай һөкүмитиниң уйғур елидә зор көләмлик тутқун һәрикити йүргүзүп йиғивелиш лагерлирини қурғанлиқи, бу орунларда һәқиқий рәқәм ениқ болмаслиқ билән биргә аз дегәндә бир милйондин ошуқ тутқун барлиқи баян қилинған шуниңдәк йәнә мәҗбурий әмгәк мәсилисиму тилға елинған. 

Доклатта йәнә, хитай һөкүмитиниң уйғур елидә лагер сиртидиму юқири техникилиқ назарәт системисини қоллиниш арқилиқ, уйғурлар вә башқа милләтләргә орвелчә сақчи системиси арқилиқ зулум қиливатқанлиқи әскәртилгән.

Америка дөләт мәҗлиси қармиқидики хитай ишлири комитетиниң бу йиллиқ доклати мәзкур комитет рәиси җәймис макговрн вә муавин рәиси марко рубийоларниң имзаси билән елан қилинған. Доклат елан қилиниши мунасивити билән 8-январ күни әтигәндә америка дөләт мәҗлиси бинасида ахбарат елан қилиш йиғини өткүзүлди. Пайтәхт вашингтон әтрапидики бир қисим уйғурлар қоллирида лагерларға соланған уруқ-туғқанлириниң рәсимлирини тутуп туруп бу ахбарат йиғиниға қатнишип диққәт тартти. Бу һәқтики тәпсили мәлуматлар тәпсили хәвәрләр сәһипимиздә давамлиқ диққитиңларда болиду.

Пикирләр (0)
Share
Толуқ бәт