Америка дөләт мәҗлиси әзалири доналд трампқа уйғурлар мәсилисини йәнә бир қетим әсләтти

Мухбиримиз әзиз
2020-01-15
Елхәт
Пикир
Share
Принт

Хитай һөкүмити билән америка оттурисидики сода келишиминиң биринчи басқучи имзалиниватқанда америка дөләт мәҗлисиниң бир қисим әзалири америка президенти доналд трампқа йәнә бир қетим уйғурлар мәсилисини әскәртти.

«Нйо-йорк вақти гезити» ниң 14-январдики саниға бесилған бу һәқтики хәвәрдә ейтилишичә, дөләт мәҗлиси әзалиридин марко рубийо, җим мәкговерн қатарлиқ алтә киши өзлириниң хитайда давам қиливатқан «америка пуқралири вә йешил карта берилгән кишиләрниң тутқун қилиниши, шуниңдәк бир қисим америка пуқралириниң хитайдин айрилишиға йол қоюлмайватқанлиқи» дин әндишә қиливатқанлиқини билдүргән. 

Уларниң президент доналд трампқа йоллиған бирләшмә мәктубида «биз сизни қәдирдан кишилири хитайда қамаққа елинған америка пуқралири билән йүзтуранә көрүрүшкә дәвәт қилимиз. Шундақла бу мәсилини рәис ши җинпиң билән болған сөһбәттә оттуриға қоюшиңизни сораймиз,» деилиду. Уларниң мәктубида хитайда қолға елинған йәттә кишиниң исми берилгән болуп, улар америка пуқраси вә йешил карта алғанлар икән. Бу мәктупта алаһидә қилип уйғур дияридин америкаға кәлгән һәмдә йешил карта берилгән бир қисим кишиләрниң әһвали тәкитлинип «бу кишиләр һазир шинҗаңда қамаққа елинған. У җайда болса һазир бир милйон сәккиз йүз миң уйғур вә башқа түркий хәлқ қамаққа елинип болди,» дейилиду. 

Мәлум болушичә, бу қетимқи мәктупта исми тилға елинған кишиләр ичидә уйғурлар йоқ икән. Әмма бәзи анализчилар мәктупта йешил карта берилгән бир қисим кишиләрниң уйғур диярида қамаққа елинишиниң алаһидә әскәртилишини уйғурлар үчүн зор иҗабий қиммәткә игә, дәп қаримақта икән.

Пикирләр (0)
Share
Толуқ бәт