Америка һөкүмити “қирғинчилиқниң алдини елиш қанун лайиһәси” гә имза қойди

• Мухбиримиз әзиз
  2019-01-16

Америка президенти доналд трамп 14-январ күни “елий визел қирғинчилиқниң алдини елиш қанун лайиһәси” гә имза қойғандин кейин, мәхсус лайиһә қанунға айланди. 16-январ күни “йерусалим почтиси” гезитигә бесилған бу һәқтики хәвәрдә ейтилишичә, “қирғинчилиқ вә башқа зораванлиқниң алдини елиш америкиниң дөләт бихәтәрликидики ядролуқ мәзмун” дейилгән. Шундақла бу һални “ядролуқ әхлақ мәсулийити” дәп атиған.

Мәзкур йеңи қанунда америка һөкүмитиниң “қирғинчилиққа, җүмлидин пуқраларни кәң көләмдә өлтүрүшкә сәвәб болғучи амилларни чәкләш, бу хил қирғинчилиққа дуч кәлгәнләрниң чеградин өтүш ишлирини әстайидил ойлишиш” мәсулийити барлиқи бекитилгән. Шуниңдәк қирғинчилиққа учриған хәлққә ярдәм беридиған пуқравий тәшкилатларға мәбләғ аҗритиш, хәлқара тәшкилатларни бу һәқтә тәдбир елишқа йетәкләш, америка дөләт мәҗлисидә қирғинчилиққа учриған хәлқләр тоғрисида қәрәллик гуваһлиқ бериш йиғини ечиш бәлгиләнгән. Шуниң билән бир вақитта америка ташқи ишлар министири һәр үч йилда бир қетим бу һәқтә баһалаш доклати язидикән.

Мәзкур қанунниң нами иккинчи дуня уруши мәзгилидики йәһудийлар қирғинчилиқида аман қалған даңлиқ язғучи елий визелдин кәлгән болуп, у 14-январдин башлап күчкә игә икән.

Буниңдин бирнәччә күн илгири, йәни 12-январ күни түркийә һөкүмитини яқлап келиватқан “йеңи шәпәқ гезити” дә мәзкур гезитниң баш муһәррири ибраһим қарагүл имзасида “уйғурлар һазир зор көләмлик қирғинчилиққа дуч келиватиду” дегән мәзмунда зор һәҗимлик мақалә елан қилинған иди.