Amérika hökümiti “Qirghinchiliqning aldini élish qanun layihesi” ge imza qoydi

Muxbirimiz eziz
2019.01.16

Amérika prézidénti donald tramp 14-yanwar küni “Éliy wizél qirghinchiliqning aldini élish qanun layihesi” ge imza qoyghandin kéyin, mexsus layihe qanun'gha aylandi. 16-Yanwar küni “Yérusalim pochtisi” gézitige bésilghan bu heqtiki xewerde éytilishiche, “Qirghinchiliq we bashqa zorawanliqning aldini élish amérikining dölet bixeterlikidiki yadroluq mezmun” déyilgen. Shundaqla bu halni “Yadroluq exlaq mes'uliyiti” dep atighan.

Mezkur yéngi qanunda amérika hökümitining “Qirghinchiliqqa, jümlidin puqralarni keng kölemde öltürüshke seweb bolghuchi amillarni cheklesh, bu xil qirghinchiliqqa duch kelgenlerning chégradin ötüsh ishlirini estayidil oylishish” mes'uliyiti barliqi békitilgen. Shuningdek qirghinchiliqqa uchrighan xelqqe yardem béridighan puqrawiy teshkilatlargha meblegh ajritish, xelq'ara teshkilatlarni bu heqte tedbir élishqa yéteklesh, amérika dölet mejliside qirghinchiliqqa uchrighan xelqler toghrisida qerellik guwahliq bérish yighini échish belgilen'gen. Shuning bilen bir waqitta amérika tashqi ishlar ministiri her üch yilda bir qétim bu heqte bahalash doklati yazidiken.

Mezkur qanunning nami ikkinchi dunya urushi mezgilidiki yehudiylar qirghinchiliqida aman qalghan dangliq yazghuchi éliy wizéldin kelgen bolup, u 14-yanwardin bashlap küchke ige iken.

Buningdin birnechche kün ilgiri, yeni 12-yanwar küni türkiye hökümitini yaqlap kéliwatqan “Yéngi shepeq géziti” de mezkur gézitning bash muherriri ibrahim qaragül imzasida “Uyghurlar hazir zor kölemlik qirghinchiliqqa duch kéliwatidu” dégen mezmunda zor hejimlik maqale élan qilin'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.