Amérika tashqiy ishlar ministiri blinkén xitayning Uyghurlargha "Irqiy qirghinchiliq" yürgüziwatqanliqini yene bir qétim tekitlidi

Muxbirimiz erkin
2021-03-01
Share

Amérika tashqiy ishlar ministiri antoni blinkén xitayning Uyghurlargha "Irqiy qirghinchiliq" qiliwatqanliqini yene bir qétim tekitligen. Blinkén bu sözlerni baydén hökümiti irqiy qirghinchiliq mesiliside "Arilash signal" bérish bilen eyibliniwatqan mezgilde qilghan. Blinkén 28-féwral kanada téléwiziye qanili CBC ning ziyaritini qobul qilip, muxbirning bu heqtiki su'aligha mundaq jawab bergen: "Shundaq, men shundaq dédim. Men amérikagha wakaleten buni éniq otturigha qoydum. Eng muhimi prézidént baydénmu shundaq dédi." biraq blinkénning éytishiche, xitayning "Irqiy qirghinchiliq" qiliwatqanliqi heqqide bayanat bérishni her bir döletning özi qarar bérishi kérek iken.

Blinkén bu sözni CBC muxbirining kanada parlaménti xitayning herkitini "Irqiy qirghinchiliq" dégenliki, biraq hökümetning téximu tepsiliy uchurgha éhtiyajliq ikenlikini qeyt qiliwatqanliqiliqi, uning kanadani uchur bilen teminlep, xitayda yüz bériwatqan ishlarning irqiy qirghinchiliq ikenlikini dellilishige yardem qilghan-qilmighanliqi heqqidiki su'aligha jawaben éytqan. Blinkén: "Her bir dölet we hökümet buni özining qanuni we emeliyitige qarap özi bahalishi we qarar qilishi lazim. Biz özimiz ishen'genni éniq bayan qilduq. Biz bashqa döletlerning bu heqte qarar bérishige qaraymiz," dégen.

Blinkén xitaygha qarshi emeliy tedbirlerni qollinish heqqide toxtilip, bu tedbirler xitayni Uyghurlarni basturushqa ishlitidighan téxnika, téxnikiliq mehsulatlar bilen teminlimeslik, mejburiy emgek mehsulatlirini import qilmasliq qatarliq wastilarni öz ichige alidighanliqi, buning döletler qilalaydighan emeliy heriketler ikenlikini bildürgen. Blinkénning tekitlishiche, "Herqaysiy döletler xitayni qattiq tenqid qilipla qoymay, belki yene emeli heriket qollinishqimu kapaletlik qilishi kérek," iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet