Америкиниң диний ишлар баш әлчиси хитайниң тәнқидигә җаваб бәрди: “әмисә, из дерәксиз ғайиб болған кишиләр қәйәрдә?”

Америка һөкүмитиниң хәлқара диний әркинлик ишлири баш әлчиси сам бровенбәк хитайниң уйғурларни өз ичигә алған мусулманлар, католикләр, буддист тибәтләр вә башқа диний гуруһларни бастуруватқанлиқиға қаратқан тәнқидидә давамлиқ чиң турди.

Бровенбәк 8‏-март күни хоңкоң чәтәллик мухбирлар кулубида нутуқ сөзләп, хитайниң диний сияситини тәнқид қилған. У, уйғурларниң диний етиқади сәвәблик тутқун қилинип, йиғивелиш лагерлириға қамалғанлиқи, бу орунлар “аз санлиқ милләтләрниң мәдәнийәт вә диний кимликини йоқитиш мәқситидә қурулғанлиқи” ни тәкитлигән.

Сам бровенбәкниң сөзи хитай һөкүмитини қаттиқ биарам қилған. Хитай ташқи ишлар министирлиқи баянат елан қилип, сам бровенбәкниң сөзлирини “яман ғәрәзлик һуҗум”, “хитайниң диний сияситигә боһтан чаплиғанлиқ” дәп әйиблигән иди.

Лекин, сам бовенбәк 11‏-январ күни тәйвәндә өткүзүлгән диний әркинлик мунбириниң йиғини арисида мухбирларға сөз қилип, униң қолида хитайда диний етиқади сәвәблик ғайиб болған вә җазаланған йүзлигән кишиниң тизимлики барлиқини билдүргән.

Фирансийә агентлиқиниң хәвәр қилишичә, бровенбәк “бу кишиләр қәйәрдә, уларға немә болди? уларниң аилә тавабиати немишқа уларниң хәвирини алалмайду?” дәп соал қойған. У йәнә йеқинқи 2 йил мабәйнидә хитайниң диний әркинлик вәзийити техиму еғирлашқанлиқи, иттипақдаш дөләтләр вә шәхсләрни һәрикәткә өтүшкә, диний әркинликкә хилаплиқ қилишқа қарши турушқа үндигән.

Мәзкур йиғинда йәнә тәйвән президенти сәй йиңвен нутуқ сөзлигән. Фирансийә агентлиқиниң хәвиридә қәйт қилинишичә, сәй йиңвен “тәйвән бири сизниң һоқуқиңизни тартивелишқа, кимликиңизни өчүрүп ташлап, турмуш әнәниңизгә хирис қилса қандақ болидиғанлиқини һес қилип йетәләйду” дегән.