Amérikining diniy ishlar bash elchisi xitayning tenqidige jawab berdi: “Emise, iz déreksiz ghayib bolghan kishiler qeyerde?”

• Muxbirimiz erkin
  2019-03-11

Amérika hökümitining xelq'ara diniy erkinlik ishliri bash elchisi sam browénbek xitayning Uyghurlarni öz ichige alghan musulmanlar, katolikler, buddist tibetler we bashqa diniy guruhlarni basturuwatqanliqigha qaratqan tenqidide dawamliq ching turdi.

Browénbek 8‏-mart küni xongkong chet'ellik muxbirlar kulubida nutuq sözlep, xitayning diniy siyasitini tenqid qilghan. U, Uyghurlarning diniy étiqadi seweblik tutqun qilinip, yighiwélish lagérlirigha qamalghanliqi, bu orunlar “Az sanliq milletlerning medeniyet we diniy kimlikini yoqitish meqsitide qurulghanliqi” ni tekitligen.

Sam browénbekning sözi xitay hökümitini qattiq bi'aram qilghan. Xitay tashqi ishlar ministirliqi bayanat élan qilip, sam browénbekning sözlirini “Yaman gherezlik hujum”, “Xitayning diniy siyasitige bohtan chaplighanliq” dep eyibligen idi.

Lékin, sam bowénbek 11‏-yanwar küni teywende ötküzülgen diniy erkinlik munbirining yighini arisida muxbirlargha söz qilip, uning qolida xitayda diniy étiqadi seweblik ghayib bolghan we jazalan'ghan yüzligen kishining tizimliki barliqini bildürgen.

Firansiye agéntliqining xewer qilishiche, browénbek “Bu kishiler qeyerde, ulargha néme boldi? ularning a'ile tawabi'ati némishqa ularning xewirini alalmaydu?” dep so'al qoyghan. U yene yéqinqi 2 yil mabeynide xitayning diniy erkinlik weziyiti téximu éghirlashqanliqi, ittipaqdash döletler we shexslerni heriketke ötüshke, diniy erkinlikke xilapliq qilishqa qarshi turushqa ündigen.

Mezkur yighinda yene teywen prézidénti sey yingwén nutuq sözligen. Firansiye agéntliqining xewiride qeyt qilinishiche, sey yingwén “Teywen biri sizning hoquqingizni tartiwélishqa, kimlikingizni öchürüp tashlap, turmush en'eningizge xiris qilsa qandaq bolidighanliqini hés qilip yételeydu” dégen.