Америка диний әркинлик комитети америка дөләт мәҗлисини уйғурларниң мәҗбури әмгәккә селинишиға қарши тәдбир қоллинишқа чақирди

Мухбиримиз әркин
2020-03-13
Елхәт
Пикир
Share
Принт

Америка диний әркинлик комитети 13-март күни баянат елан қилип, хитайниң уйғур вә башқа мусулманларни тоқумчилиқ завутлирида мәҗбури әмгәккә салғанлиқини қаттиқ тәнқид қилған. Баянатта, бәзи асаслиқ америка ширкәтлирини оз ичигә алған нурғун карханиларниң мәҗбури әмгәк күчлирини ишлитишкә бивастә четишлиқ икәнлики тәкитлинип, америка авам вә кеңәш палаталирида сунулған «уйғур мәҗбури әмгәкниң алдини елиш қанун лайиһәси» ни қарши алидиғанлиқини билдүргән. Мәзкур қанун лайиһәси бу һәптиниң башлирида америка авам палата әзаси җим микговерн билән кеңәш палата әзаси марку рубио тәрипидин оттуриға қоюлған иди.

Баянатта диний әркинлик комитетиниң рәиси гүрий бейерниң сөзи нәқил кәлтүрүлүп, «хитай һөкүмити өзиниң уйғур вә башқа мусулманларға тутқан хата муамилисини завутларда мәҗбури әмгәккә селиш билән бирләштүрди. Биз барлиқ америка ширкәтлирини җүмлидин амазон, найки, алма вә калвен клайн қатарлиқларни өзлириниң хитайдики тәминат зәнҗирлири үстидин әтраплиқ тәкшүрүш елип беришқа, мәҗбури әмгәккә четишлиқ икәнлики гуманлиқ болған һәрқандақ паалийәтни дәрһал тохтитишқа чақиримиз» дейилгән. Баянатта йәнә америка дөләт мәҗлисиниң «уйғур мәҗбури әмгәкниң алдини елиш қанун лайиһәси» ни оңушлуқ мақуллашқа чақиридиғанлиқи, һәрқандақ мәҗбури әмгәк мәһсулатиниң америкаға импорт қилиниши қобул қилинмайдиғанлиқини билдүрүлгән. 

Өткән һәптә австралийәдики бир әқил амбири доклат елан қилип, хитай һөкүмитиниң уйғурларни хитай завут-карханилирида кәң-көләмлик мәҗбури әмгәккә селиватқанлиқи, уларниң бир қисминиң лагирдики тутқунлар икәнликини ашкарилиған. Бу доклат дуняда қаттиқ ғулғула қозғиған. Америка хәлқара диний әркинлик комитетиниң баянатиниң ахирида, трамп һөкүмитиниң магнитиский қануни вә хәлқара диний әркинлик қанунини ишлитип, диний әркинликни дәпсәндә қилишта җавабкарлиқи бар хитай әмәлдарлирини, болупму уйғур аптоном районлуқ партком секритари чен чүәнгони җазалиш тәләп қилинған.

Пикирләр (0)
Share
Толуқ бәт