Amérika diniy erkinlik komitéti amérika dölet mejlisini Uyghurlarning mejburi emgekke sélinishigha qarshi tedbir qollinishqa chaqirdi

Muxbirimiz erkin
2020-03-13
Élxet
Pikir
Share
Print

Amérika diniy erkinlik komitéti 13-mart küni bayanat élan qilip, xitayning Uyghur we bashqa musulmanlarni toqumchiliq zawutlirida mejburi emgekke salghanliqini qattiq tenqid qilghan. Bayanatta, bezi asasliq amérika shirketlirini oz ichige alghan nurghun karxanilarning mejburi emgek küchlirini ishlitishke biwaste chétishliq ikenliki tekitlinip, amérika awam we kéngesh palatalirida sunulghan "Uyghur mejburi emgekning aldini élish qanun layihesi" ni qarshi alidighanliqini bildürgen. Mezkur qanun layihesi bu heptining bashlirida amérika awam palata ezasi jim mikgowérn bilen kéngesh palata ezasi marku rubi'o teripidin otturigha qoyulghan idi.

Bayanatta diniy erkinlik komitétining re'isi güriy béyérning sözi neqil keltürülüp, "Xitay hökümiti özining Uyghur we bashqa musulmanlargha tutqan xata mu'amilisini zawutlarda mejburi emgekke sélish bilen birleshtürdi. Biz barliq amérika shirketlirini jümlidin amazon, nayki, alma we kalwén klayn qatarliqlarni özlirining xitaydiki teminat zenjirliri üstidin etrapliq tekshürüsh élip bérishqa, mejburi emgekke chétishliq ikenliki gumanliq bolghan herqandaq pa'aliyetni derhal toxtitishqa chaqirimiz" déyilgen. Bayanatta yene amérika dölet mejlisining "Uyghur mejburi emgekning aldini élish qanun layihesi" ni ongushluq maqullashqa chaqiridighanliqi, herqandaq mejburi emgek mehsulatining amérikagha import qilinishi qobul qilinmaydighanliqini bildürülgen. 

Ötken hepte awstraliyediki bir eqil ambiri doklat élan qilip, xitay hökümitining Uyghurlarni xitay zawut-karxanilirida keng-kölemlik mejburi emgekke séliwatqanliqi, ularning bir qismining lagirdiki tutqunlar ikenlikini ashkarilighan. Bu doklat dunyada qattiq ghulghula qozghighan. Amérika xelq'ara diniy erkinlik komitétining bayanatining axirida, tramp hökümitining magnitiskiy qanuni we xelq'ara diniy erkinlik qanunini ishlitip, diniy erkinlikni depsende qilishta jawabkarliqi bar xitay emeldarlirini, bolupmu Uyghur aptonom rayonluq partkom sékritari chén chüen'goni jazalish telep qilin'ghan.

Toluq bet