Amérika hökümiti xitayni Uyghur élida musteqil tekshürüshke yol qoyushqa chaqirdi

Muxbirimiz irade
2019-03-14
Élxet
Pikir
Share
Print

Amérika hökümiti Uyghur élidiki lagérlar mesiliside xitayni dawamliq tenqidleshni kücheytti. 13-Mart küni b d t ning jenwediki merkizide Uyghur élidiki lagér mesilisi boyiche bir yighin chaqirildi. Mezkur yighinning bir alahidiliki bu yighin amérika tashqi ishlar ministirliqining sahibxaniliqida échilghan.

Firansiye agéntliqining xewer qilishiche, yighinda amérika tashqi ishlar ministirliqining xelq'ara jinayi ishlar edliye bashqarmisining bashliqi kelliy kurriy xanim söz qilip, xitay hökümitini musteqil tekshürgüchilerning Uyghur élidiki lagérlarni ziyaret qilishigha yol qoyushqa chaqiriq qilghan. U sözide yene xitay hökümitini Uyghur élidiki lagér tüzümini ayaghlashturup, lagérlardiki milyonlighan tutqunlarni azad qilishni telep qilghan.

Melum bolushiche, kélliy kurriy xanim sözi dawamida yene islam hemkarliq teshkilatining xitayni qollap élan qilghan bayanatini tenqidlesh bilen birge yene türkiye hökümitining lagérlar mesilisidiki pozitsiyesini maxtighan.

Igilinishiche, mezkur yighinda kélliy kurriy xanim bilen birge yene Uyghur weziyitini tetqiq qilip kéliwatqan mutexessis adriyan zéniz we lagérdin qutulup chiqqan shahit ömer bék'alimu qatniship söz qilghan.

Tetqiqatchi adriyan zéniz pakitlar arqiliq nöwette Uyghur élidiki lagérlarda az dégende bir yérim milyon adem barliqini bildürgen we uni sistémiliq halda élip bériliwatqan medeniyet qirghinchiliqi, dep atighan.

Xitay hökümitining qattiq naraziliq bildürüshige qarimay mezkur yighin dawamlashqan we küchlük inkas peyda qilghan. Bu yighin'gha en'gliye kanada we gollandiye qatarliq döletlerningmu jenwede turushluq wekiller hey'iti qatniship, xitay hökümitining rayondiki siyasetliridin endishiliniwatqanliqini ipade qilghan.

En'giliyening jenwediki wekiller hey'iti tiwittérdiki resmiy hésabi arqiliq en'giliye hökümitining xitayning Uyghur élidiki siyasetliridin endishe qiliwatqanliqini tekitligen hemde xitay hökümitini Uyghur élida musteqil tekshürüshke yol qoyushqa chaqirghan.

Firansiye agéntliqining xewer qilishiche, xitayning jenwediki bir déplomati amérika bashchiliqida élip bérilghan mezkur yighinni "Xitaygha hujum qilishni meqset qilghan siyasiy yighin" dégen we Uyghur élida lagér yoqluqini ilgiri sürgen.

Xitay tashqi ishlar ministirliqining bayanatchisi lu kangmu peyshenbe künidiki bayanatida xitayning amérika tashqi ishlar ministirliqining Uyghurlar heqqidiki doklatidin qattiq narazi bolghanliqini bildürüp, amérikining xitayning ichki ishlirigha arilashmasliqini telep qilghan.

Toluq bet