Amérika dölet mejilisi ezaliri tramp hökümitini Uyghur rayonidiki lagérlar mesilisige jiddiy arilishishqa chaqirdi

Muxbirimiz shöhret hoshur
2019-04-03
Élxet
Pikir
Share
Print

Bügün amérika dölet mejilisidiki marko rubiyu, bob menendez qatarliq 24 neper yuquri palata we 19 neper töwen palata ezasi amérika tashqiy ishlar ministéri mayk pompiyo, maliye ministéri stéw mnuchin we soda ministiri wilbur roslargha mektub yollap, Uyghur rayondiki kishilik hoquq krizisida jawabkarliqi bar dep qaralghan  chén chüen'go qatarliq xitay emeldarlirini "Magnétiskiy qanuni" boyiche jazalashni yene bir qétim telep qildi.


Mektubta mu'awin prézdént mayk pensning Uyghur weziyiti heqqide xitaygha qaratqan yéqinqi qattiq tenqidliri alqishlinish bilen birlikte nöwettiki Uyghur mesiliside peqetla xitayni teqidlep qoyushning yéterlik bolmaydighanliqi, emeliy herket qollinishning lazimliqi tekitlendi.


Dölet mejlisi ezaliri bu mektubida yene hökümettin amérika shirketliri ichide xitayning Uyghur rayonidiki basturush herketlirini téxnika üsküniliri bilen teminlewatqan we yaki xitayning shu xil herketlerni sadir qiliwatqan "Daxu'ang" qatarliq shirketliri bilen hemkarliqining bar-yoqluqini éniqlap chiqishnimu qaytdin telep qildi.


Mektubning axirida mu'awin tashqiy ishlar ministiri lawro stonning bultur 12‏-ayda hökümetning Uyghur weziyiti heqqide qiliwatqan ishliri heqqide bergen melumatliri eslitilip, hökümetning hazirgha qeder bu heqte ishlen'gen barliq xizmetliri heqqide dölet mejlisige doklat bérishi telep qilindi. Teleplerning biride amérika wetendishi bolghan Uyghurlar we amérikaning yéshil kartisini alghan Uyghurlarning yighiwélish lagérliridiki tughqanliri, jümlidin erkin asiya radiyosi Uyghur bölümi muxbirlirining lagérdiki a'ile-tawabi'atliri heqqide hökümetning hazirghiche némilerni qilghanliqi we qandaq jawabqa érishkenliki soraldi.


Toluq bet