Nyu-york waqti géziti: "Xitay pütkül bir sheherni türmige aylanduruwetken"

Muxbirimiz irade
2019-04-04
Élxet
Pikir
Share
Print

Bügün amérikadiki nopuzluq axbarat organliridin "Nyu-york waqti géziti" de mezkur gézit muxbirlirining qeshqerdiki neq ziyariti asasida ishlen'gen bir süretlik xewer élan qilindi.

"Xitay pütkül bir sheherni türmige aylanduruwetken" namliq bu süretlik xewerde neq meydandin tartilghan foto süretler we qisqa sin körünüshliri arqiliq Uyghurlar uchrawatqan nöwettiki éghir zulumlar yorutup bérilgen.

Muxbir bayanida xitay hökümitining rayonda lagérlarni tesis qilip, milyonlarche Uyghurlarni lagérgha qamighanliqi, emma lagér sirtidiki Uyghurlarningmu bir üsti ochuq türmide yashaydighanliqini eskertken. Xewerdiki körünüshlerde kocha-koylar, ashxana we hetta meschitlerge ésilghan sanaqsiz kaméralar, hésabsiz saqchi we bixeterlik xadimliri shundaqla yene Uyghurlarni yollarda toxtitip soraq qiliwatqan, téléfonini tekshürüwatqan körünüshler körsitilgen.

Süretlik xewerde yene qeshqerde 2016-yili gugul xeritisidin qupquruq turghan bir parche yerde hazir texminen 20 ming adem patidighan lagér qurulghanliqini, tutqunlarning qaranchuqsiz qalghan balilirining yétimxanilargha yighiwélinidighanliqi, qeshqerdiki peqet birla déril'itamgha ötken yili 7000 bala qobul qilin'ghanliqini bayan qilghan.

Xewerde yene mekteplerdiki Uyghur balilirining dawamliq soraq qilinip turidighanliqi, bir bala ata-anisining özige "Qur'an" sürilirini ögetkenlikini mu'ellimige éytip bergendin kéyin u balining ata-anisining etisila ghayib bolghanliqi bayan qilin'ghan.

Muxbir xewirining axirida mana mushuninggha oxshash bir éghiz söz, öch-adawiti bar qolum-qoshna yaki qorqup ketken bir balining sözi seweblik nurghun Uyghurlarning saqchining dawamliq teqib qilishigha yaki lagérgha qamilishqa mehkum bolidighanliqini bayan qilghan shundaqla Uyghurlar nöwette bashtin kechürüwatqan éghir zulumlarni yorutup bergen.

Toluq bet