CECC Baydén hökümitining qamaqtiki Uyghur zhurnalistliri mesilisini küntertipke keltürüshni telep qildi
2024.05.03
Amérika dölet mejlisining xitay ishliri ijra'iye komitéti 3-may “Xelq'ara axbarat erkinlik küni” de bayanat élan qilip, baydén hökümitining xitay emeldarliri bilen bolghan uchrishishta xongkong we xitay türmiliride qamaqtiki zhurnalistlar, axbarat xizmetchiliri we neshriyatchilarni, jümlidin Uyghur zhurnalist, neshriyatchi we tor aktipliridin erkin tursun, qurban mamut, ilham toxtilarning mesilisini küntertipke qoyushini telep qilghan.
Amérika dölet mejlisi xitay ishliri ijra'iye komitétining qosh re'isliridin, awam palata ezasi kristofér simit we kéngesh palata ezasi jé'a mérkéléyning namida élan qilin'ghan bayanatta, xitayning “Dunyadiki herqandaq dölettin köp zhurnalistni qamaqqa alghanliqi we teshwiqat ékisporti qiliwatqanliqi” bildürülgen.
Bayanatta mundaq déyilgen: “Axbarat erkinlikige kapaletlik qilish amérikaning xitay xelq jumhuriyiti bilen bolghan munasiwette muhim amilni teshkil qilishi kérek. Musteqil axbaratchiliqning kishilik hoquqni qoghdash we uningdin behrimen bolushta intayin muhimliqigha qet'iy ishinimiz…”
Buning aldida, yeni 2-may küni chégrasiz muxbirlar teshkilati 2024-yilliq “Dunya axbarat erkinlik körsetküchi” ni élan qilip, xitayning yenila dunya boyiche eng köp muxbirlarni türmige qamighan dölet ikenlikini élan qilghan idi. Amérika dölet mejlisi xitay ishliri ijra'iye komitéti 3-may élan qilghan bayanatta, baydén hökümitining xitay xelq jumhuriyiti emeldarliri bilen uchrashqan kelgüsi bir qanche ayda, xitay xelq jumhuriyiti we xongkongda naheq tutqun qilin'ghan zhurnalistlar, blogchilar, axbarat xizmetchiliri we puqra zhurnalistlarni, jümlidin erkin tursun, qurban mamut, ilham toxti, shundaqla xu'ang chi, guy mingxey, chén jyérén, jimiy ley, ley shindé we bashqa nurghun kishilerning mesilini “Küntertipke qoyushi” ni telep qilghan.
Bayanatta qeyt qilinishiche, “Ötken bir yilda, xitayning axbarat muhiti dawamliq tarayghan, xitay xelq jumhuriyiti nechche milyard dollar xejlep, xewer we uchurning aylinishini sénzorlighan, söz erkinlik hoquqini qollan'ghan xitay puqralirini dawamliq jazalighan.”