Рошән аббас ханим америка һөкүмитини уйғур елидики зулумға тәдбир қоллинишқа чақирди

Мухбиримиз ирадә
2019-05-09
Елхәт
Пикир
Share
Принт

Америкадики «уйғур һәрикити» тәшкилатиниң башлиқи рошән аббас ханим 9-май күни «америкада бүгүн» намлиқ хәвәр торида бир парчә мақалә елан қилип, америка һөкүмитини уйғур елида давамлишиватқан инсанийәткә қарши җинайәткә қарита тәдбир елишқа чақирди.

Рошән ханим мақалисидә уйғурлар 1949-йили хитай коммунист һакимийити тәрипидин ишғал қилинғандин бери һәр түрлүк зулумларға учрап кәлгән болсиму, бирақ хитайниң «бир бәлвағ бир йол» қурулуши сәвәблик интайин һәл қилғуч вә мол байлиққа толған бу земинниң игилириниң хитайниң көзигә қадалған миқ болуп қалғанлиқини баян қилған. 

Рошән ханим мақалисидә америка дөләт мудапиә министирлиқиниң йеқинда елан қилған сөзини нәқил кәлтүрүп, уйғур елидики җаза лагерлирида нөвәттә 3 милйон әтрапида киши қамалғанлиқини қәйт қилған вә райондики вәзийәтниң қандақтур дини әркинлик дәпсәндичилики вә яки башқа дәпсәндичилик болуштин һалқип кәткәнликини әскәрткән. Рошән ханим мақалисидә «милйонлиған уйғурлар һазир хитай компартийисиниң инсанийәткә қарши ишләватқан җинайитигә учраватиду. Бу әмди дини әркинлик мәсилиси әмәс, һалбуки һаят-маматлиқ мәсилиси» дәп көрсәткән. 

Рошән ханим мақалисиниң ахирида америка һөкүмитини бу вәзийәт алдида сүкүттә турмаслиққа вә «йәршари магнетский қануни» ни ишқа селиш арқилиқ бу зулумда рол еливатқан хитай әмәлдарлирини җазалашқа чақирған вә пүткүл бир милләтниң тәқдириниң американиң қисқа муддәтлик тиҗарий сиясәтлириниң қурбаниға айланмаслиқи керәкликини әскәрткән.

Пикирләр (0)
Share
Толуқ бәт