Петисбург почтиси гезити: «америка уйғурлар үчүн дәс туруши керәк»

Мухбиримиз әркин
2019-05-13
Елхәт
Пикир
Share
Принт

Америкадики «петисбург почтиси гезити» 11‏-май күни тәһрират мақалиси елан қилип, американиң уйғурлар үчүн дәс туруши керәкликини билдүргән.

Мақалидә илгири сүрүлүшичә, америка дөләт мудапиә министирлиқиниң лагердики мусулманларниң саниниң көплүкини һесаблап чиқиши, хитайниң һәрбий вә иқтисади тәһдитигә дуч келиватқан америка үчүн җиддий сигнал икән. Йеқинда америка дөләт мудапиә министирлиқиниң ярдәмчи министири рәнди шрайвер, 3 милйондәк уйғур вә башқа мусулман хәлқләрниң «җаза лагерлири» ға қамалғанлиқини илгири сүргән иди. «Петисбург почтиси гезити», хитайниң уйғур балилириға диний китабларни өгитишни қанунсиз, дәп елан қилип, ата-аниларниң балилириға уйғурчә исим қоюшни чәклигәнлики, униң йәнә кәң көләмлик д н а әвришкилирини йиғип, районда һәрбий һаләт қануни йүргүзүватқанлиқини тәкитлигән. Мақалидә трамп һөкүмитиниң хитай билән болған иқтисадий урушни күчәйткәнлики, бәш бурҗәклик бинаниң доклатида хитайниң җуғрапийәви-сиясий вә һәрбий җәһәтләрдин хирис қиливатқанлиқи тәкитләнгәнлики билдүрүлүп, хитайниң радикал исламға қарши туруш намидики кәспи маһарәт мәркәзлиридә қамақлиқ кишиләрниң 3 милйонға көпәйгәнлики, «қайта тәрбийәләш лагерлири» ниң «җаза лагери» дәп тәриплиниватқанлиқи баян қилинған.

Мақалиниң ахирида мундақ дейилгән: «көп хил динларға һөрмәт қилиш вә ибадәт әркинлики американиң қурулушидики ачқучлуқ принсипларниң бири, шуниңдәк униң әң зор артуқчилиқидур. Һалбуки, америка һәр бир дөләттики һәтта өзиниң иттипақдаш дөләтлиридики кишилик һоқуқни, аз санлиқ милләтләрни қоғдашни үстигә алалмайду. Шуниң билән бир вақитта америка башқа дөләтләрниң дин вә аз санлиқ милләтләргә қандақ муамилә қилишиға зуван сүрмәсликтәк прагматик йол тутмаслиқи керәк. Америка биз яшап кәлгән принсиплар үчүн дәс туруши, хитайдики уйғурларниң һоқуқи үчүн гәп қилиши керәк.»

Пикирләр (0)
Share
Толуқ бәт