Pétisburg pochtisi géziti: "Amérika Uyghurlar üchün des turushi kérek"

Muxbirimiz erkin
2019-05-13
Élxet
Pikir
Share
Print

Amérikadiki "Pétisburg pochtisi géziti" 11‏-may küni tehrirat maqalisi élan qilip, amérikaning Uyghurlar üchün des turushi kéreklikini bildürgen.

Maqalide ilgiri sürülüshiche, amérika dölet mudapi'e ministirliqining lagérdiki musulmanlarning sanining köplükini hésablap chiqishi, xitayning herbiy we iqtisadi tehditige duch kéliwatqan amérika üchün jiddiy signal iken. Yéqinda amérika dölet mudapi'e ministirliqining yardemchi ministiri rendi shraywér, 3 milyondek Uyghur we bashqa musulman xelqlerning "Jaza lagérliri" gha qamalghanliqini ilgiri sürgen idi. "Pétisburg pochtisi géziti", xitayning Uyghur balilirigha diniy kitablarni ögitishni qanunsiz, dep élan qilip, ata-anilarning balilirigha Uyghurche isim qoyushni chekligenliki, uning yene keng kölemlik d n a ewrishkilirini yighip, rayonda herbiy halet qanuni yürgüzüwatqanliqini tekitligen. Maqalide tramp hökümitining xitay bilen bolghan iqtisadiy urushni kücheytkenliki, besh burjeklik binaning doklatida xitayning jughrapiyewi-siyasiy we herbiy jehetlerdin xiris qiliwatqanliqi tekitlen'genliki bildürülüp, xitayning radikal islamgha qarshi turush namidiki kespi maharet merkezliride qamaqliq kishilerning 3 milyon'gha köpeygenliki, "Qayta terbiyelesh lagérliri" ning "Jaza lagéri" dep teripliniwatqanliqi bayan qilin'ghan.

Maqalining axirida mundaq déyilgen: "Köp xil dinlargha hörmet qilish we ibadet erkinliki amérikaning qurulushidiki achquchluq prinsiplarning biri, shuningdek uning eng zor artuqchiliqidur. Halbuki, amérika her bir dölettiki hetta özining ittipaqdash döletliridiki kishilik hoquqni, az sanliq milletlerni qoghdashni üstige alalmaydu. Shuning bilen bir waqitta amérika bashqa döletlerning din we az sanliq milletlerge qandaq mu'amile qilishigha zuwan sürmesliktek pragmatik yol tutmasliqi kérek. Amérika biz yashap kelgen prinsiplar üchün des turushi, xitaydiki Uyghurlarning hoquqi üchün gep qilishi kérek."

Toluq bet