“вашингтон почтиси” ниң обзорчиси президент байденни уйғурларға һессидашлиқ қилиш биләнла чәклинип қалмаслиққа чақирған

Мухбиримиз әркин
2022-05-13
Share

“вашингтон почтиси” гезиниң обзорчиси җош роген 13-май күни мақалә елан қилип, президент байденниң уйғурларға һессидашлиқ қилишини махтиған, бирақ уни һессидашлиқ қилиш биләнла чәклинип қалмаслиққа, техиму көп әмәлий һәрикәт қоллинишқа чақирған. Америка һөкүмитини уйғурлар мәсилисидә изчил түрдә техиму кәскин болушқа чақирип кәлгән җош роген бу чақириқни 13-май “вашингтон почтиси” да елан қилған “байден хитай тәрипидин зиянкәшликкә учриған америкалиқ уйғурлар билән көрүшкәндә немә иш болди” мавзулуқ мақалисидә оттуриға қойған.

Америка президенти байден өткән һәптә ақсарайдики роза һейтлиқ паалийәттә америка диний әркинлик комитетиниң муавин рәиси нури түркәл билән хитай һөкүмити тәрипидин тутқун қилинған дохтур гүлшән аббасниң қизи зиба мурат билән көрүшүп, улардин уйғурларниң вәзийитини аңлиған. Бу байденниң президентлиқ вәзипигә олтурған 16 айдин бери тунҗи қетим уйғурлар билән учришип, уйғурларниң вәзийитини бивастә улардин аңлиши икән.

Җош роген мақалисидә, байденниң уларға наһайити һессидашлиқ қилғанлиқи, байденниң инкаси “хитай рәиси ши җинпиңға униң уйғур мусулманлирини кәң көләмлик тутқун қилишини ‛қилишқа тегишлик тоғра иш‚ дигән бурунқи президентниң инкасиға қариғанда, қарши елинидиған бир селиштурма” болғанлиқини тәкитлигән.

Лекин җош рогенниң ейтишичә, “байден һөкүмити хитайниң чегра һалқиған бастурушиниң нишанидики америкалиқлар мәсилисини һәл қилиш ‍үчүн техиму көп ишларни қилиши керәк,” икән. Җош роген мақалисиниң ахирида байден һөкүмити хитайниң һәркитигә қарита чүшәнчиси ениқ болсиму, бирақ униң қилған ишлириниң йәнила йетәрлик әмәсликини билдүрүп: “бәлким, әмди президент икки америкалиқ шаһитниң кәчмишини аңлап, һөкүмәт машинисини һәрикәткә кәлтүрүши мумкин. У әмди һечким маңа буни ейтмиди, дийәлмәйду,” дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт