“Washin'gton pochtisi” ning obzorchisi prézidént baydénni Uyghurlargha héssidashliq qilish bilenla cheklinip qalmasliqqa chaqirghan

Muxbirimiz erkin
2022-05-13

“Washin'gton pochtisi” gézining obzorchisi josh rogén 13-may küni maqale élan qilip, prézidént baydénning Uyghurlargha héssidashliq qilishini maxtighan, biraq uni héssidashliq qilish bilenla cheklinip qalmasliqqa, téximu köp emeliy heriket qollinishqa chaqirghan. Amérika hökümitini Uyghurlar mesiliside izchil türde téximu keskin bolushqa chaqirip kelgen josh rogén bu chaqiriqni 13-may “Washin'gton pochtisi” da élan qilghan “Baydén xitay teripidin ziyankeshlikke uchrighan amérikaliq Uyghurlar bilen körüshkende néme ish boldi” mawzuluq maqaliside otturigha qoyghan.

Amérika prézidénti baydén ötken hepte aqsaraydiki roza héytliq pa'aliyette amérika diniy erkinlik komitétining mu'awin re'isi nuri türkel bilen xitay hökümiti teripidin tutqun qilin'ghan doxtur gülshen abbasning qizi ziba murat bilen körüshüp, ulardin Uyghurlarning weziyitini anglighan. Bu baydénning prézidéntliq wezipige olturghan 16 aydin béri tunji qétim Uyghurlar bilen uchriship, Uyghurlarning weziyitini biwaste ulardin anglishi iken.

Josh rogén maqaliside, baydénning ulargha nahayiti héssidashliq qilghanliqi, baydénning inkasi “Xitay re'isi shi jinpinggha uning Uyghur musulmanlirini keng kölemlik tutqun qilishini ‛qilishqa tégishlik toghra ish‚ digen burunqi prézidéntning inkasigha qarighanda, qarshi élinidighan bir sélishturma” bolghanliqini tekitligen.

Lékin josh rogénning éytishiche, “Baydén hökümiti xitayning chégra halqighan basturushining nishanidiki amérikaliqlar mesilisini hel qilish ‍üchün téximu köp ishlarni qilishi kérek,” iken. Josh rogén maqalisining axirida baydén hökümiti xitayning herkitige qarita chüshenchisi éniq bolsimu, biraq uning qilghan ishlirining yenila yéterlik emeslikini bildürüp: “Belkim, emdi prézidént ikki amérikaliq shahitning kechmishini anglap, hökümet mashinisini heriketke keltürüshi mumkin. U emdi héchkim manga buni éytmidi, diyelmeydu,” dégen.