Гордон чаң: америка уйғурларни йоқ қилишқа урунуватқан хитай һакимийити билән алақә қилмаслиқи керәк

Мухбиримиз ирадә
2019-05-14
Елхәт
Пикир
Share
Принт

Америкадики тонулған хитай ишлири тәтқиқатчиси, язғучи гордон чаң ши җинпиң һөкүмитиниң инсанийәткә қарши җинайәт өткүзүватқанлиқини билдүрди.

Гордон чаң 13-май күни, америкадики «брейтбарт» намлиқ хәвәр ториниң радийо программисиға қатнашқанда уйғур районида йолға қоюлуватқан йепиқ тәрбийә лагерлири һәққидә мәхсус тохталған. У бу лагерларниң натсистлар германийәсидики «йиғивелиш лагерлири» билән характер җәһәттин охшашлиқини ипадә қилип: «бу лагерларда инсанлар өливатиду. Гәрчә бу лагерларда зәһәрлик газ өйлири болмисиму, әмма нурғун кишиләрни өлүмгә елип баридиған сиясәтләр иҗра қилинмақта. Биз даириләрниң бу җәсәтләрни бир тәрәп қилиш үчүн нурғунлиған җәсәт көйдүрүш орунлирини селиватқанлиқини билимиз» дегән.

Гордон чаң уйғур елидики лагерларниң шималий корейәдики йиғивелиш лагерлиридинму қорқунчлуқ бир җинайәт икәнликини ипадә қилип, хәлқара җәмийәтни буниңға қарши аваз чиқиришқа чақирған.

Гордон чаң сөзидә йәнә мундақ дегән: «хитай бир қанунлуқ дөләт әмәс. Биз униң уйғур мәдәнийитини йоқ қилишқа урунуватқанлиқиға қарап шундақ дейәләймизки, әгәр, бу бир қирғинчилиқ болмайдикән, у һалда бу, бир аз санлиқ милләтни йоқ қилиш, уларниң мәдәнийитини өчүрүп ташлашқа урунғанлиқтур, йәни, мәдәнийәт қирғинчилиқидур».

Гордон чаң сөзидә, американиң әйни йилларда натсистлар германийәси һөкүмити билән алақә орнатмиғанлиқини радийо аңлиғучиларниң сәмигә селип: «америка бүгүнму худди шу натсистларға охшап қалған хитай һакимийити биләнму алақә қилмаслиқи керәк» дәп әскәрткән.

Пикирләр (0)
Share
Толуқ бәт