Gordon chang: amérika Uyghurlarni yoq qilishqa urunuwatqan xitay hakimiyiti bilen alaqe qilmasliqi kérek

Muxbirimiz irade
2019-05-14
Élxet
Pikir
Share
Print

Amérikadiki tonulghan xitay ishliri tetqiqatchisi, yazghuchi gordon chang shi jinping hökümitining insaniyetke qarshi jinayet ötküzüwatqanliqini bildürdi.

Gordon chang 13-may küni, amérikadiki "Bréytbart" namliq xewer torining radiyo programmisigha qatnashqanda Uyghur rayonida yolgha qoyuluwatqan yépiq terbiye lagérliri heqqide mexsus toxtalghan. U bu lagérlarning natsistlar gérmaniyesidiki "Yighiwélish lagérliri" bilen xaraktér jehettin oxshashliqini ipade qilip: "Bu lagérlarda insanlar öliwatidu. Gerche bu lagérlarda zeherlik gaz öyliri bolmisimu, emma nurghun kishilerni ölümge élip baridighan siyasetler ijra qilinmaqta. Biz da'irilerning bu jesetlerni bir terep qilish üchün nurghunlighan jeset köydürüsh orunlirini séliwatqanliqini bilimiz" dégen.

Gordon chang Uyghur élidiki lagérlarning shimaliy koréyediki yighiwélish lagérliridinmu qorqunchluq bir jinayet ikenlikini ipade qilip, xelq'ara jem'iyetni buninggha qarshi awaz chiqirishqa chaqirghan.

Gordon chang sözide yene mundaq dégen: "Xitay bir qanunluq dölet emes. Biz uning Uyghur medeniyitini yoq qilishqa urunuwatqanliqigha qarap shundaq déyeleymizki, eger, bu bir qirghinchiliq bolmaydiken, u halda bu, bir az sanliq milletni yoq qilish, ularning medeniyitini öchürüp tashlashqa urun'ghanliqtur, yeni, medeniyet qirghinchiliqidur".

Gordon chang sözide, amérikaning eyni yillarda natsistlar gérmaniyesi hökümiti bilen alaqe ornatmighanliqini radiyo anglighuchilarning semige sélip: "Amérika bügünmu xuddi shu natsistlargha oxshap qalghan xitay hakimiyiti bilenmu alaqe qilmasliqi kérek" dep eskertken.

Toluq bet