Хитай һөкүмити американиң уйғурлар мәсилисидики мәйданини тәнқидлиди

Мухбиримиз әзиз
2019-06-11
Елхәт
Пикир
Share
Принт

Хитай ташқи ишлар министирлиқи 11-июн күни америка һөкүмитиниң уйғурлар дияридики сиясий бастуруш қилмишлири тоғрисида қилған сөзлирини «пүтүнләй асассиз баһа бериш» дәп тәнқидлиди.

Хитай һөкүмити башқурушидики «йәр шари вақти гезити» ниң 11-июндики санида ейтилишичә, ташқи ишлар министирлиқиниң баянатчиси гең шуаң бу һәқтә сөз қилип: «көз билән көргәнгә ишиниш әң ақиланилиқтур» дегән һәмдә уйғур диярида һечқандақ «тәрбийәләш мәркизи» ниң мәвҗут әмәсликини, бу йәрдә бар болғанлириниң пәқәт «кәспий тәрбийәләш мәркәзлири» икәнликини, бу мәркәзләр қурулғандин буян уйғур диярида «һечқандақ зорлуқ һәрикәтлириниң йүз бәрмигәнлики» ни алаһидә тәкитлигән. Шундақла «шинҗаңдики мәсчитләрниң сани америкидики мәсчитләрниң санидин он һәссә артуқ» дегән. Әмма уйғурлар дияридики мәсчитләрниң қупқуруқ болуп қалғанлиқини тилға алмиған.

Хитай әмәлдарлириниң америка ташқи ишлар министири майк помпйониң сөзлирини тәнқидлиши хитай ташқи ишлар министирлиқниң муавин министири җаң хәнхуйниң толиму қопалларчә сөзлиридиму әкс етиду. У бу һәқтә хитай мухбирлириниң соаллириға җаваб берип: «дөлитимизниң шинҗаң мәсилисини биряқлиқ қилиш усулини тәнқидлимәкчи болғанлар соғуқ урушниң қәбрилиридин өмиләп чиққан мурдилардур. Улар һечқачан ялған-явидақ гәпләрни пош дәп бақмиған» дегән. Шундақла «милйонларчә киши лагерға қамалған» дегән баянни «хәлқарада җуңгониң образиға қара сувиғанлиқ» дегән.

Һалбуки мутәхәссисләр «хитай һөкүмитиниң уйғурлар дияридики бастуруш һәрикәтлириниң бизгә мәлум болғанлири пәқәт музтағниң чоққиси халас» дейишмәктә.

Пикирләр (0)
Share
Толуқ бәт