Amérika dölet mejlisining ezaliri Uyghurlar mesilisi boyiche bayanat élan qildi

5-Iyul amérika dölet mejlisi ezaliridin amérika awam palata ezasi jéymis mekgowrén we amérika kéngesh palata ezasi marko rubiyo Uyghur diyaridiki yuqiri téxnikiliq teqib sistémisi we jaza lagérliri üchün jiddiy tedbir élinish heqqide birleshme bayanat élan qilghan.

Marko rubiyo we jéymis mekgowrén bayanatida xitay hökümitining Uyghurlarning kishilik hoquqi we erkinlikige qarita yürgüzüwatqan depsendichiliklirining Uyghur rayonida eng qebih shekilde dawam qiliwatqanliqi we uning uzaqqa sozulghan bir basturush ikenlikini alahide tilgha alghan. Ular yene ötken yili aprélda amérika hökümitige sunulghan bu xildiki insaniyetke qarshi jinayetni qiliwatqan xitay emeldarlar üchün jaza qollinish heqqidiki teklipining inkassiz qalghanliqini éytip ötken.

Bayanatta yene 2009-yili ürümchide yüz bergen “5-Iyul ürümchi qirghinchiliqi” qisqighine tonushturulghandin kéyin, amérika hökümitige Uyghurlar mesilisige qarita exlaqiy mejburiyetlirini ada qilishi lazimliqi we xelq'ara jem'iyetningmu bu mesilige choqum inkas bildürüshi kérekliki heqqide chaqiriq qilin'ghan.

Yéqindin buyan amérika hökümitidiki nopuzluq erbablar Uyghurlar mesilisige yéqindin köngül bölüp kelmekte.