Америка авам палатасида мақулланған ахбарат вә пикир әркинликини илгири сүрүш һәққидики қарарда уйғурларға мунасивәтлик мәзмунлар орун алди

Мухбиримиз ирадә
2019-07-16
Елхәт
Пикир
Share
Принт

15-Июл күни, америка дөләт мәҗлиси авам палатасида дуняда ахбарат вә пикир әркинликини илгири сүрүш һәққидә бир қарар мақулланди.

Мәзкур қарарнамә америка авам палатасиниң әзаси вә шундақла авам палата истихбарат комитетиниң башлиқи адам шиф тәрипидин тонуштурулған болуп, униңда уйғурлар вә болупму әркин асия радийоси уйғур бөлүмигә мунасивәтлик мәзмунлар орун алған.

Қарарниң хитайниң ахбарат әркинликигә селиватқан зийиниға аит қисмида, хитай дөлити ичидә ахбаратни қаттиқ контрол қилидиған хитай компартийәсиниң һазир өз чегралиридин һалқип, чәтәлләрдики ахбаратниму контрол қилиш үчүн һәрикәт қиливатқанлиқи баян қилинған вә буниңға хитай һөкүмитиниң америка әркин асия радийоси уйғур бөлүми мухбирлириниң уйғур районидики еғир кишилик һоқуқ дәпсәндичиликлирини хәвәр қилишини тосуш үчүн уларниң юртлиридики аилә-тавабиатлириға тәһдит селиш вә һәтта түрмигә солаштәк васитиләрни қоллиниватқанлиқи баян қилинған.

Қарарда, америка һөкүмитиниң дуня миқясидики мушу хил вәқәләргә қарита очуқ вә кәскин позитсийә тутуп, уни «дуня ахбарат әркинлики күни» гә охшаш пурсәтләрдә тәкитлиши, барлиқ тәһдитләргә қаримай хизмәт қиливатқан журналист вә ахбарат хизмәтчилириниң демократийәни қоғдаш, иҗтимаий җәмийәтни күчләндүрүш үчүн қошқан төһписини муәййәнләштүрүши керәклики, һәрқайси дөләт һөкүмәтлирини б д ниң ахбарат әркинликини қоғдашқа мунасивәтлик әһдинамилири бойичә иш көрүшкә чақириши вә уларниң қарши һәрикәтлирини очуқ-ашкара тәнқид қилиши керәкликидәк маддилар орун алған.

Юқиридики бу қарар, америка һөкүмитиниң дуня миқясида ахбарат вә пикир әркинликигә қаритилған бесимниң күчийиватқанлиқидәк бир әмәлийәткә қарита тәдбир қоллинип, сағлам демократийәниң асаси болған әркин ахбаратчилиқни паал тәшәббус қилиш вә қоллашни, әркин ахбаратчилиқни американиң демократийә, кишилик һоқуқ вә дөләтни қанун арқилиқ идарә қилишни тәшәббус қилиш хизмәтлириниң муһим вәзиписи қилишни мәқсәт қилидикән.

Мәзкур қарарниң тонуштурғучиси болған авам палата истихбарат комитетиниң башлиқи адам шиф йеқинда америкиниң «2020-йиллиқ истихбарат хизмәтлирини әмәлийләштүрүш» һәққидики қанун лайиһәсини тонуштурғаниди. У лайиһәниң 5-баб 2-маддиси уйғурларға мунасивәтлик болуп, униңда америка дөләтлик истихбарат идарисидин хитай һөкүмитиниң уйғур районида йүргүзүватқан бесим сиясәтлири вә лагер түзүми үстидә тәкшүрүш елип бериши тәләп қилинған иди.

Пикирләр (0)
Share
Толуқ бәт