Amérika awam palatasida maqullan'ghan axbarat we pikir erkinlikini ilgiri sürüsh heqqidiki qararda Uyghurlargha munasiwetlik mezmunlar orun aldi

Muxbirimiz irade
2019-07-16
Share

15-Iyul küni, amérika dölet mejlisi awam palatasida dunyada axbarat we pikir erkinlikini ilgiri sürüsh heqqide bir qarar maqullandi.

Mezkur qararname amérika awam palatasining ezasi we shundaqla awam palata istixbarat komitétining bashliqi adam shif teripidin tonushturulghan bolup, uningda Uyghurlar we bolupmu erkin asiya radiyosi Uyghur bölümige munasiwetlik mezmunlar orun alghan.

Qararning xitayning axbarat erkinlikige séliwatqan ziyinigha a'it qismida, xitay döliti ichide axbaratni qattiq kontrol qilidighan xitay kompartiyesining hazir öz chégraliridin halqip, chet'ellerdiki axbaratnimu kontrol qilish üchün heriket qiliwatqanliqi bayan qilin'ghan we buninggha xitay hökümitining amérika erkin asiya radiyosi Uyghur bölümi muxbirlirining Uyghur rayonidiki éghir kishilik hoquq depsendichiliklirini xewer qilishini tosush üchün ularning yurtliridiki a'ile-tawabi'atlirigha tehdit sélish we hetta türmige solashtek wasitilerni qolliniwatqanliqi bayan qilin'ghan.

Qararda, amérika hökümitining dunya miqyasidiki mushu xil weqelerge qarita ochuq we keskin pozitsiye tutup, uni "Dunya axbarat erkinliki küni" ge oxshash pursetlerde tekitlishi, barliq tehditlerge qarimay xizmet qiliwatqan zhurnalist we axbarat xizmetchilirining démokratiyeni qoghdash, ijtima'iy jem'iyetni küchlendürüsh üchün qoshqan töhpisini mu'eyyenleshtürüshi kérekliki, herqaysi dölet hökümetlirini b d ning axbarat erkinlikini qoghdashqa munasiwetlik ehdinamiliri boyiche ish körüshke chaqirishi we ularning qarshi heriketlirini ochuq-ashkara tenqid qilishi kéreklikidek maddilar orun alghan.

Yuqiridiki bu qarar, amérika hökümitining dunya miqyasida axbarat we pikir erkinlikige qaritilghan bésimning küchiyiwatqanliqidek bir emeliyetke qarita tedbir qollinip, saghlam démokratiyening asasi bolghan erkin axbaratchiliqni pa'al teshebbus qilish we qollashni, erkin axbaratchiliqni amérikaning démokratiye, kishilik hoquq we döletni qanun arqiliq idare qilishni teshebbus qilish xizmetlirining muhim wezipisi qilishni meqset qilidiken.

Mezkur qararning tonushturghuchisi bolghan awam palata istixbarat komitétining bashliqi adam shif yéqinda amérikining "2020-Yilliq istixbarat xizmetlirini emeliyleshtürüsh" heqqidiki qanun layihesini tonushturghanidi. U layihening 5-bab 2-maddisi Uyghurlargha munasiwetlik bolup, uningda amérika döletlik istixbarat idarisidin xitay hökümitining Uyghur rayonida yürgüzüwatqan bésim siyasetliri we lagér tüzümi üstide tekshürüsh élip bérishi telep qilin'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet