Хитай, америка ташқи ишлар министириниң уйғурлар һәққидики сөзигә инкас қайтурди

Мухбиримиз әркин
2019-09-09
Елхәт
Пикир
Share
Принт

Хитай ташқи ишлар министирлиқи 9‏-сентәбир дүшәнбә күни америка ташқи ишлар министири майк помпейониң өткән җүмә күни америкадики бир университетта сөзлигән уйғурлар һәққидики сөзигә инкас қайтуруп, майк помпейони уйғурлар һәққидә «мәслийәтсизлик билән сөзләш» билән әйиблигән.

Майк помпейо 6‏-сентәбир күни американиң канзас штат университетида нутуқ сөзләп, американиң уйғур мәсилисини б д т омуми йиғинида оттуриға қоюп, башқа дөләтләрни хитайниң уйғур мусулманлириға тутқан муамилисигә диққәт қилишқа чақириши мумкинликини билдүргән.

У сөзидә: «биз бу кишиләрниң (уйғурларниң) әркинликини үмид қилидиғанлиқи, буниң тартивелишқа болмайдиған кишилик түп һәқ-һоқуқ мәсилиси» икәнликини тәкитләп, «хитайдики уйғур вә башқа мусулманларға тутулған муамилиниң бу әсирдә йүз бәргән дунядики әң еғир дағ» икәнликини тәкитлигән. У йәнә бу йәрдики дәпсәндичиликниң көлиминиң наһайити зор икәнлики, нөвәттики мәсилә башқиларни сәпәрвәр қилип вә хитай һөкүмити билән һәмкарлишип, хитай һөкүмити вә коммунистик партийәсини «бу ишниң уларниң мәнпәәтигә пайдилиқ әмәслики», «башқа инсанларға бундақ муамилә қилишниң тоғра әмәсликигә қайил қилиш» икәнликини тәкитлигәниди.

Лекин, «җәнубий хитай сәһәр почтиси гезити» ниң хәвәр қилишичә, хитай ташқи ишлар министири баянатчиси хуа чүнйиң дүшәнбә күни помпейони тәнқидләп: «буниң алақидар америка әмәлдарлириниң тунҗи қетим шинҗаң тоғрисида мәсулийәтсиз сөзләрни қилиши, хитайниң шинҗаңни башқуруш сиясити тоғрисида қалаймиқан сөзлиши әмәслики» ни илгири сүргән. Униң илгири сүрүшичә, «шинҗаң мәсилиси хитайниң ички иши болуп, чәтәлниң униңға арилишиш һоқуқи йоқ» икән. Хуа чүнйиң йәнә «хитайниң шинҗаңдики һәрикитиниң башқа нурғун дөләтләрдики әсәбийлик вә террорлуққа зәрбә бериш һәрикити билән һечқандақ пәрқи йоқлуқи» ни тәкитлигән. Майк помпейо канзас университетидики сөзидә хитайниң «бу лагерлар кишиләрни тәрбийәләп, уларниң радикаллиқ идийәсини юқтурувелишидин қоғдайду» дегән сөзлирини рәт қилғаниди.

Пикирләр (0)
Share
Толуқ бәт