Xitay, amérika tashqi ishlar ministirining Uyghurlar heqqidiki sözige inkas qayturdi

Muxbirimiz erkin
2019-09-09
Élxet
Pikir
Share
Print

Xitay tashqi ishlar ministirliqi 9‏-séntebir düshenbe küni amérika tashqi ishlar ministiri mayk pompéyoning ötken jüme küni amérikadiki bir uniwérsitétta sözligen Uyghurlar heqqidiki sözige inkas qayturup, mayk pompéyoni Uyghurlar heqqide "Mesliyetsizlik bilen sözlesh" bilen eyibligen.

Mayk pompéyo 6‏-séntebir küni amérikaning kanzas shtat uniwérsitétida nutuq sözlep, amérikaning Uyghur mesilisini b d t omumi yighinida otturigha qoyup, bashqa döletlerni xitayning Uyghur musulmanlirigha tutqan mu'amilisige diqqet qilishqa chaqirishi mumkinlikini bildürgen.

U sözide: "Biz bu kishilerning (Uyghurlarning) erkinlikini ümid qilidighanliqi, buning tartiwélishqa bolmaydighan kishilik tüp heq-hoquq mesilisi" ikenlikini tekitlep, "Xitaydiki Uyghur we bashqa musulmanlargha tutulghan mu'amilining bu esirde yüz bergen dunyadiki eng éghir dagh" ikenlikini tekitligen. U yene bu yerdiki depsendichilikning kölimining nahayiti zor ikenliki, nöwettiki mesile bashqilarni seperwer qilip we xitay hökümiti bilen hemkarliship, xitay hökümiti we kommunistik partiyesini "Bu ishning ularning menp'e'etige paydiliq emesliki", "Bashqa insanlargha bundaq mu'amile qilishning toghra emeslikige qayil qilish" ikenlikini tekitligenidi.

Lékin, "Jenubiy xitay seher pochtisi géziti" ning xewer qilishiche, xitay tashqi ishlar ministiri bayanatchisi xu'a chünying düshenbe küni pompéyoni tenqidlep: "Buning alaqidar amérika emeldarlirining tunji qétim shinjang toghrisida mes'uliyetsiz sözlerni qilishi, xitayning shinjangni bashqurush siyasiti toghrisida qalaymiqan sözlishi emesliki" ni ilgiri sürgen. Uning ilgiri sürüshiche, "Shinjang mesilisi xitayning ichki ishi bolup, chet'elning uninggha arilishish hoquqi yoq" iken. Xu'a chünying yene "Xitayning shinjangdiki herikitining bashqa nurghun döletlerdiki esebiylik we térrorluqqa zerbe bérish herikiti bilen héchqandaq perqi yoqluqi" ni tekitligen. Mayk pompéyo kanzas uniwérsitétidiki sözide xitayning "Bu lagérlar kishilerni terbiyelep, ularning radikalliq idiyesini yuqturuwélishidin qoghdaydu" dégen sözlirini ret qilghanidi.

Toluq bet